Ish-drejtori i Agjencisë së Sigurisë Informative, në Serbi Aleksandar Vulin, ka spikatur sërish në publik me një deklaratë se agjentë të CIA janë infiltruar në institucionet shtetërore.
Vulin tha se këtë e di edhe presidenti i Serbisë. “Në ambientin e presidentit Vuçiç ka njerëz që nuk punojnë për të mirën e këtij vendi dhe punojnë kundër tij. Ai do të vendosë për çdo hap të mëtejshëm, është shumë i informuar, di shumë gjëra edhe para se t’ia ofronin shërbimet”, tha Vulin.
Sipas Robert Kozmës, deputet i Frontit të Gjelbër-Majtas, deklarata e Vulin duhet parë në dy mënyra: “Nga njëra anë, është një model tashmë i njohur i krijimit të panikut në opinion, krijimit të një imazhi se siguria e Serbisë është e kërcënuar nga të gjitha anët, se jemi në rrethana të jashtëzakonshme në të cilat qytetarët nuk duhet të pyesin pse jemi vendi me inflacioni më të lartë, nuk kërkojnë aspak kushte për zgjedhje të ndershme, rregullimin e listës së votuesve dhe që mediat me frekuencë kombëtare të punojnë profesionalisht, por që duhet të jemi mirënjohës nëse “marrim bukën e gojës” nga gjoja presidenti”.
Në të njëjtën kohë, shton ai, ne nuk mund të mos vëzhgojmë deklarata të tilla si pjesë e luftës së fraksioneve të ndryshme brenda regjimit të korruptuar qeverisës për poste në Qeverinë e ardhshme.
“Dhe kjo luftë zhvillohet gjithmonë në mënyrë oborrtare dhe përmes trullosjes së fraksioneve të tjera të klikës përparimtare dhe satelitëve të koalicionit të tyre. Mirëpo, edhe në mënyrë sharlatane, sepse pas deklaratës së Vulin-it, do të duhej pyetur se pse nuk reagojnë shërbimet e sigurisë, nëse dihet se dikush punon për një vend tjetër dhe nënkuptohet se është spiun”, përfundon Kozma.
Miloš Pavloviç, nënkryetar i Lëvizjes Kombëtare të Serbisë, thotë për Danas se deklarata e Aleksandar Vulin është një tjetër në vargun e deklaratave që tentojnë ta largojnë vëmendjen nga problemet reale, që janë negociatat për Kosovën dhe vjedhja e zgjedhjeve.
“Në kontekstin e fjalës së Aleksandër Vulinit, besoj se Aleksandar Vuçiç bashkëpunon me shumë sukses me administratën amerikane dhe evropiane, gjë që mund të shihet në shembullin e negociatave për statusin e Kosovës, ndërsa deklaratat e Vulin shërbejnë për votuesit e tij për të treguar se nuk e kanë braktisur politikën e bashkëpunimit me Federatën Ruse. Në përgjithësi, një spin që i shërben qëllimeve të brendshme ditore politike”, përfundon bashkëbiseduesi i Danas.
Para së gjithash, thotë Miodrag Prekoviç, Aleksandar Vulin nuk del në publik për asgjë pa miratimin e Aleksandar Vuçiçit.
“Nëse ai tashmë po bën deklarata të tilla, atëherë le të thonë të dy qartë se cilët janë këta persona, e të mos merren me spin e mistere që qytetarët e Serbisë ta marrin me mend se kush është. E gjithë kjo synon të largojë vëmendjen e publikut nga disa tema shumë më të rëndësishme, siç është kalimi i të gjitha kompetencave të shtetit të Serbisë në Kosovë dhe Metohi në duart e bashkëpunëtorit të tyre Albin Kurti. Krimi, korrupsioni dhe tenderët e shumtë të manipuluar apo dështimi për të përmbushur kushtet themelore demokratike para zgjedhjeve të tjera lokale. Kjo është një recetë e sprovuar e pushtetit aktual, të cilën ata e zbatojnë prej vitesh, sa herë duhet të mbulojnë keqbërjet e tyre të mëdha”, tha ai. /Përshtatur nga Danas
