Kryetarët e BDI-së, në Maqedoninë e Veriut, Ali Ahmeti, të LP-së, Skender Rexhepi, të PDE-së, Arijanit Hoxha dhe i PDSH-së, Menduh Thaçi kanë nënshkruar sot marrëveshjen për themelimin e Frontit Europian, për zgjedhjet që do të mbahen këtë vit atje. Pas nënshkrimit të marrëveshjes, Arijanit Hoxha tha se kjo garë e Frontit Evropian është si UÇK e vitit 2001 në Maqedoni dhe se prijësi i tyre është Ali Ahmeti.
Ndërsa, kryetari i PDSH-së, Menduh Thaçi gjatë fjalimit tha se kjo është garë me Rusinë jo me kryetarët e opozitës. Nga ana tjetër, Skender Rexhepi tha se fitorja e Bujar Osmanit në zgjedhje presidenciale do të thotë fitore bindëse për Frontin Evropian në zgjedhjet Kuvendare. Kryetari i BDI-së, Ali Ahmeti në fjalimin e tij tha se ky koalicion është vazhdimësi e nismës së Arben Xhaferit.
“Miqësia jonë e sotme do të thotë vazhdimësi e bashkëpunimit që e nisëm me Arben Xhaferin. Sot e vazhdojmë një rrugëtim kombëtar. Ky front nuk ka interesa personale, por ka interesa kombëtare”, tha Ahmeti.
