Qytetarët që kanë debi të akumuluara si pasojë e mospagesës së faturave të energjisë elektrike kanë afat deri në fund të këtij viti për të lidhur aktmarrëveshje me OSHEE-në, me qëllim për të përfituar nga skemat lehtësuese që ul kamatëvonesat nga 50-100 për qind.
Aktualisht, niveli i debisë apo faturave të pa paguara kundrejt OSHEE arrin rreth 85 miliardë lekë. Bashkitë, ujësjellësit dhe kopshtet zënë çerekun e kësaj shume dhe pjesa dërrmuese është nga familjarët, të cilët nuk kanë paguar faturat e energjisë ndër vite. Për këtë arsye, OSHEE ka dalë së fundmi me një skemë të re lehtësuese për shlyerjen e këtyre kësteve të prapambetura duke amnistuar edhe një pjesë të kamatëvonesave.
Ata që nuk pranojnë t’i nënshtrohen kësaj skeme do të penalizohen, pasi futen në të ashtuquajturën “listë të zezë” apo atë që do të përballen me ndërprerjen e energjisë elektrike. Ndaj, apeli shkon për ta, që të paraqiten pranë zyrave të OSHEE për të lidhur akt marrëveshjen për shlyerjen me këste. Nga njoftimi i kompanisë në fillim të këtij muaji deri më tani rezultojnë rreth 600 akt marrëveshje të nënshkruara, 300 prej të cilave nga familjarët janë realizuar me një pagesë të menjëhershme.
PENSIONISTET
Në ka një kategori që është e para në pagesat e rregullta të faturave, por edhe më të ndërgjegjshmit në raport me detyrimet ndaj shtetit janë pensionistët. Pikërisht këta, si një ndër shtresat e margjinalizuara të shoqërisë, bashkë me kategori të tjera janë përfituesit e parë të shlyerjes së debive të prapambetura përmes një tarife fikse mujore prej 1200 lekësh. Bashkë me ta, edhe klientë familjarë që trajtohen me ndihmë ekonomike dhe klientët me status të veçantë.
Klientët e tjerë familjarë mund të paguajnë detyrimet e prapambetura me këste fikse mujore 2800 lekë, ndërsa klientët jofamiljarë, buxhetorë dhe jobuxhetorë mund të paguajnë detyrimet e prapambetura me këste të përcaktuara që variojnë nga 24 deri në 120 këste, bazuar në vlerën e debisë. Pra, në bazë të vlerës së debisë bëhet edhe përcaktimi i kësteve që ata do të likuidojnë.
PROCEDURA E PERFITIMIT
Çdo familjar duhet të paraqitet në zyrat e OSHEE-së për të sqaruar me procedurën dhe dokumentet që nevojiten për të lidhur akt marrëveshjen. Kusht për t’u futur në marrëdhënie me OSHEE-në është likuidimi i rregullt i faturave për vitin 2023 e në vijim. Marrëveshja vlen vetëm për detyrime të akumuluara deri në dhjetorin e vitit 2022. Në skemat e aktmarrëveshjeve, që do të zbatohen gjatë këtij viti, do të përfshihen gjithashtu edhe detyrimet e papaguara nga faturat, dëmi ekonomik, fatura sistemuese, fatura testim matësi, fatura korrektive, që i përkasin vitit 2023 e në vijim.
Sa u takon skemave të pagesave të menjëhershme, nëse paguhet e gjitha kamatëvonesa falet në masën 70 për qind. Për klientët jofamiljarë buxhetorë dhe jobuxhetorë përfitojnë reduktim të kamatëvonesës në masën 50 për qind, ndërsa kategoria klientë jo familjarë biznes i vogël përfitojnë reduktim të kamatëvonesës në masën 100 për qind. Në këtë rast, biznesi i vogël është i favorizuar nga kamatëvonesës. Për t’u theksuar është fakti se nga lehtësirat e aplikueshme, OSHEE ul vetëm masën e kamatëvonesave, por jo të vlerës së energjisë elektrike të shpenzuar.
Pra, çfarë është shpenzuar OSHEE nuk e amniston, por vetëm barrën e kamatëvonesave ndër vite, një mënyrë kjo për të mbushur arkën e sistemit të shpërndarjes së energjisë elektrike, por edhe lehtësi për qytetarët. Dhe çka është më e rëndësishme për qytetarët është fakti që kjo skemë do jetë në fuqi deri në fund të vitit 2024, ndaj apeli i OSHEE është të paraqiten sa më shpejt për shlyerjen e debive kundrejt lehtësimit nga kamatëvonesat e akumuluara ndër vite.
VAZHDO TË LEXOSH MË TEPËR PËR TEMËN
Çfarë pritet të ndodhë nga OSHEE me mbi 1 mijë abonentë
Rama: Kush nuk paguan dritat, nuk do të ketë drita!
Çfarë do të ndodhë me klientët që nuk kanë shlyer detyrimet
