Kryetari i Komisionit Qendror të Zgjedhjeve, Ilirjan Celibashi tha të mërkurën se duke nisur nga data 11 janar nisin aplikimet në platformën për emigrantët për t’u regjistruar si votues në zgjedhjet e përgjithshme të vitit 2025.
Në një intervistë televizive Celibashi theksoi se emigrantët kanë gati 60 ditë në dispozicion për të kryer regjistrimin, pasi 63 ditë para zgjedhjeve KQZ duhet të publikojë listën përfundimtare të zgjedhësve.
“11 janari është afati i fundit për ne si institucion që duhet të kemi gati platformën për emigrantët. Që nga ai moment ata janë në gjendje të aplikojnë. Kanë 60 ditë në dispozicion, por edhe ato ditë nuk janë të plota, sepse 63 ditë para datës së zgjedhjeve komisioneri duhet të publikojë listën paraprake të zgjedhësve”, nënvizoi Celibashi.
Pas kësaj periudhe, shtoi ai, pasi shpallet lista përfundimtare e atyre që do të votojnë jashtë vendit dhe dikush nuk e gjen emrin në listë, ka të drejtën e ankimit në gjykatë deri 7 ditë para ditës së zgjedhjeve.
“Për votuesit është shumë e rëndësishme që 120 ditë para datës së zgjedhjeve kanë mundësi të aplikojnë dhe kanë gati 60 ditë për t’u regjistruar”, tha Celibashi.
Celibashi u shpreh se, “emigrantët duhet të vërtetojnë që banojnë jashtë territorit të Shqipërisë, apo gjenden në ditën e votimit në mënyrë të përligjur jashtë territorit të Shqipërisë. Do duhet të kenë një adresë të saktë, në këtë adresë do u dërgohet fleta e votimit nga KQZ”.
“Nëse ngelemi te çështja e regjistrimit dhe mënyra se si do funksionojë kjo platformë, që do të menaxhohet nga KQZ, çdo votues që ka interesin për të votuar nga vendi ku ai banon, nëpërmjet kësaj platforme mund të ushtrojë këtë të drejtë dhe të paraqes këtë kërkesë. Platforma garanton 100 % mbi autenticitetin e këtij aplikimi dhe identitetin e votuesit”, tha Celibashi.
Celibashi sqaroi gjithashtu se, “secili prej tyre do krijojë një llogari të vetën, si në çdo aplikacion tjetër. Nuk ka asnjë lloj komplikimi teknik për efekt të garancive të identitetit të personit që do bëjë aplikimin. Ne kemi propozuar që të jetë edhe një faktorë biometrik identifikues, si njohja e fytyrës nëpërmjet të cilit ai do duhet të krijojë llogarinë e vetë dhe nëpërmjet këtyre tre elementëve ne do bindemi për identitetin unik të votuesve”.
VAZHDO TË LEXOSH MË TEPËR PËR TEMËN
Nga pakti i 5 qershorit te vota e emigrantëve, si po shkohet në votime!
Votimi i emigrantëve, Celibashi: Regjistrimi do jetë online, të dhënat në “dorë” të sigurt!
