Ish-kryeministri i Holandës, Mark Rutte, do të jetë Sekretari i Përgjithshëm i NATO-s. Emërimi i tij vjen në një moment kritik për sigurinë kontinentale ndërsa Rusia vazhdon luftën kundër Ukrainës. Ai pasoi norvegjezin Jens Stoltenberg i cili e mbajti pozitën e shefit të NATO-s për një dekadë. Stoltenbergu deklaroi gjatë ditës se NATO do të jetë në “duar të sigurta” nën lidershipin e Ruttes. Rutte, kryeministri më jetëgjatë në historinë e Holandës, në përgjithësi, konsiderohet të jetë një ndër mbështetësit më të mëdhenj të synimeve transatlantike të Kosovës.
E vizitën e fundit në Kosovë, ai e realizoi vitin e kaluar, pikërisht në kulmin e tensioneve Kosovë-Serbi, si sinjal për angazhimin e palëkundur për sigurinë e Kosovës. Institucionet e Kosovës duan t’iu bashkohen strukturave të NATO-s, duke filluar nga Parteriteti për Paqe (PfP). Kosova merr pjesë në disa ushtrime të organizuara nga NATO-ja, por nuk ka qasje në menynë e plotë të të gjitha aktiviteteve bashkëpunuese në kuadër të NATO-s, kryesisht për shkak se katër aleatë vazhdojnë të mos e njohin.
Liderët e Kosovës uruan të martën ish-kryeministrin e Holandës, Mark Rutte, pas pranimit zyrtar të detyrës së Sekretarit të Përgjithshëm të NATO-s, duke theksuar pritshmëritë për bashkëpunim drejt avancimit të synimeve të vendit të vogël ballkanik për anëtarësim në aleancën ushtarake të udhëhequr nga Shtetet e Bashkura (SHBA). Kryeministri i Kosovës, Albin Kurti, deklaroi se mezi pret të bashkëpunojë me Rutten gjatë mandatit të tij të parë si shef i NATO-s. Osmani, gjithashtu, shprehu bindjen se nën udhëheqjen e shefit të ri të NATO-s do të forcohen edhe më shumë partneriteti dhe bashkëpunimi.
VAZHDO TË LEXOSH MË TEPËR PËR TEMËN
Emri i liderit të ri të NATO-s, “marrëveshje e mbyllur”
