Gjykata e Posaçme rrëzoi kërkesën e ish-ministrit të Mbrojtjes Fatmir Mediu për kryerjen e një riekspertimi pjesor për kostot e dëmit ekonomiko-financiar të demontimit në fabrikën e Poliçanit. Në një deklaratë për mediat pas këtij vendimi, Mediu u shpreh se ky është një akt nul, por që do t’i qëndrojë deri në fund të vërtetës së tij, shkruan A2.
Sipas tij nëse gjykata e prokuroria nëse duan të zbulojnë të vërtetën, mund ta bënin aktin e ekspertimit.
“Është një akt nul, që nuk reflekton as ligje dhe as marrëdhënie. Nëse ne paskemi qenë dritë shkurtër, ne si ministri mbrojte paskemi qenë siç pretendojnë ata, po partnerët tanë pse investuan pas Gërdecit 24 mln euro dhe u kthyen 7 mln euro. Pra një dëm rreth 17 mln dollarë. Asnjëherë demontimi nuk ka qenë me fitim. Gjykata tha që është ajo që çmon aktin e ekspertimit. Ndaj ne vijuam debatin pyetje për pyetje-përgjigje për përgjigje. Mendoj se gjykata e prokuroria nëse duan të zbulojnë të vërtetën, mund ta bënin aktin e ekspertimit. Kjo i kalon absurditetet e gjykimit. Nëse duan të vazhdojnë një proces fars unë do t’i qëndroj deri në fund bindjes dhe të vërtetës së këtij procesi, me keqardhjen më të madhe për viktimat. Kjo nuk ka qenë e lidhur me Ministrinë e Mbrojtjes”.
Mediu theksoi se Sekretari amerikan i mbrojtjes, ministri gjerman dhe gjeneralë kanë pranuar të dëshmojnë në këtë çështje dhe kjo sipas tij është rruga e të vërtetës për drejtësi, raporton A2.
“GJKKO a duhet të lexojë kodin e procedurës? Ligjin? Kodin penal? Si zhvillohet procesi? U pranuan dëshmitarë njerëz që kishin punuar në Gërdec dhe ministrit i thoshin kush e mori në punë që s’kishin lidhje me ministrin, kurse sot qeveria nënshkruan dhe ka drejtorë që thonë s’kemi lidhje me njëri-tjetrin Unë duhet të dija se kush ishin rojet dhe punonjësit në Gërdec. Sekretari amerikan i Mbrojtjes, ministri gjerman i Mbrojtjes, gjeneralë që kanë punuar me ne, britanikë e italianë e kanë pranuar të vijnë të dëshmojnë dhe janë të incizuar dhe deklaratë noteriale, por duhet vullnet kjo është rruga drejt të vërtetës”.
Duke e konsideruar një proces në kundërshtim me ligjin, Mediu shprehet i zhgënjyer nga drejtësia e re, që sipas tij duhet të ishte si e një vendi të NATO-së dhe jo e kohës së diktaturës.
“Nëse po bëjnë një proces në kundërshtim më ligjin e argumentet absurdë, mendoj që kjo nuk është më drejtësi. Kemi shpresuar për drejtësi të një vendi anëtar të NATO-s dhe jo kohën kur brohorisnim tradhtari në litar. Kjo nuk është më drejtësi. Nëse partia ka vendosur që Mediu të jetë viktima e radhës të na rrojë partia!”
