Policia e Gjirokastrës ka sekuestruar 21 kg drogë, duke arrestuar dy poseduesit e saj dhe shpallur në kërkim një tjetër.
Sipas policisë, dy të arrestuarit kanë tentuar ta kalojnë drogën drejt Greqisë me mjetin e tyre, pasi e kishin ndarë në dy çanta dhe të presuar në trajtën e cokollatës.
Njoftimi i policisë:
Finalizohet me sukses operacioni antidrogë i koduar “Fluksi”.
Sekuestrohen 21 kg cannabis sativa.
Vihen në pranga 2 shtetas, si dhe një shtetas tjetër shpallet në kërkim.
Në vijim të punës për goditjen e veprimtarisë kriminale në fushën e narkotikëve dhe pas informacioneve të marra në rrugë operative, Policia e Gjirokastrës zhvilloi operacionin antidrogë të koduar “Fluksi”, në kuadër të të cilit u arrestuan në flagrancë shtetasit:
K. M., 22 vjeç, banues në fshatin Karjan, Gjirokastër.
Dh. K., 48 vjeç, banues në Kotë, Vlorë.
Arrestimi i shtetasve të mësipërm u bë pasi gjatë mbasdites së djeshme, shtetasi K.M. është kapur në flagrancë duke transportuar me automjetin e tij drejt kufirit Grek, dy çanta brenda të cilave kishte 21 kg lëndë narkotike Cannabis Sattiva si dhe lëndë narkotike e presuar në trajtën e cokollatës, të cilat u sekuestruan në cilësinë e provës materiale.
Nga veprimet e kryera hetimore rezultoi se lëndën narkotike do ta transportonte për në shtetin Grek shtetasi Dh. K.
Gjithashtu u shpall në kërkim shtetasi J. K., si organizator i kësaj veprimtarie kriminale.
Po kështu gjatë kontrollit të banesës së shtetasit K.M. u konstatuan të kultivuara disa bimë narkotike.
Materialet në ngarkim të shtetasve të mësipërm i kaluan Prokurorisë pranë Gjykatës së Shkallës së Parë Gjirokastër, për veprën penale “Trafikim i lëndëve narkotike” e mbetur në tentativë, e kryer në bashkëpunim, gjithashtu për shtetasin K.M. u referuan materialet dhe për veprën penale “Kultivim i bimëve narkotike”.
VAZHDO TË LEXOSH MË TEPËR PËR TEMËN
Bularat/ Ndalohen 5 persona, mes tyre kreu i OMONIA-s
