Cristiano Ronaldo në fillimet e karrierës si profesionist ka qenë ndryshe, edhe si futbollist. Vitali Kutuzov ka dhënë një pasqyrë të viteve të hershme të ish-bashkëlojtarit të tij Cristiano Ronaldo te Sporting.
Lojtari i pensionuar bjellorus ka folur për dëshirën e Ronaldos për të qenë më i miri, e cila u shfaq edhe si 17-vjeçar. “Ne ishim dy fëmijë në një ekip kampionësh që i kishte fituar të gjitha. Ai ishte 17 vjeç dhe unë 21. Ai më pyeti për Milanin dhe se si ishte të stërvitesh me lojtarë të atij kalibri”, – tha Kutuzov.
Kutuzov vazhdoi të tregojë se si ka ndryshuar loja e Ronaldos që nga ajo kohë: “Ai gjithmonë ka dashur të përfundojë aksionet, edhe pse tani ai është një lojtar ndryshe. Në atë kohë ai ishte më shumë një driblues, sot ai është i kompletuar dhe kontribuon në çdo kuptim”.
Dyshja gëzonin një marrëdhënie të ngushtë dhe Kutuzov kujtoi kur Ronaldo ishte i emocionuar kur erdhi në stërvitje me makinën e tij të parë:
“Ne kemi ndarë dhomën shumë herë. Më kujtohet kur bleu makinën e tij të parë, një Mercedes që nuk dinte as ta ngiste. Por kënaqësia e tij kur mbërriti në stërvitje me një makinë që kishte blerë ishte e pabesueshme”.
