Shkon në katër numri i skuadrave gjysmëfinaliste të play-off në NBA. Pas Miamit dhe Boston, edhe skuadra kampione në fuqi e Milwaukee Bucks avancon më tej nga Konferenca e Lindjes.
Bucks fituan 116-100 ndaj Chicago Bulls. Ndeshje e komanduar dhe fitore e merituar nga vendasit, që e mbyllën 4-1 serinë e çerekfinaleve. Antetokounmpo me 33 pikë ishte lider për Milwaukee, që në gjysmëfinale do të luajë ndaj Boston.
Në Perëndim, një biletë për në gjysmëfinalet e play off-it ka siguruar edhe ekipi i Golden State, që mposhti me vështirësi 102-98 Denver Nuggets dhe fitoi 4-1 serinë e takimeve.
Një sfidë e ekuilibruar deri në fund, ku për Warriors u dallua i zakonshmi Stephen Curry, autor i 30 pikëve. Po 30 pikë e 19 rebound realizoi edhe Doncic për miqtë, por që nuk mjaftuan. Golden State do të përballet në gjysmëfinale me fituesin e çiftit Memphis-Minnesota, me Grizzlies që udhëheqin 3-2 në çerekfinale.
