Svetlana Timofeeva, 33-vjeçarja ruse, njihet në internet me pseudonimin Lana Sator.
Që nga viti 2007, ajo ka një blog për “Ndërtesa të braktisura, strehime për bomba, instalime ushtarake, pajisje të vdekura”, dhe më vonë ka transferuar botime nga “Live Journal” në “Instagram”, ku më shumë se 250 mijë njerëz e ndjekin atë.
Tre muaj më parë, për shkak të pozicionit të saj kundër luftës, ajo u detyrua të emigronte nga Rusia në Gjeorgji, detaj që përmendet edhe në dosjen e Prokurorisë së Elbasanit, ku si adresë e dytë banimi jepet edhe Gjeorgjia, më konkretisht rruga “Vashlovani”, në kryeqytetin Tbilisi. Vajza ruse ka pasur edhe probleme të mëparshme me ligjet për shkak të vizitave të saj në zona të mbrojtura. Seti i saj fotografik nga uzina “Energomash” në Khimki afër Moskës, e cila prodhon motorë raketash, zemëroi kreun e atëhershëm të “Roskosmos”, Dmitry Rogozin, i cili e quajti “Sator” dhe miqtë e saj “minj arrogantë me kamera”. Ashtu si “Sator”, edhe rusi tjetër i arrestuar, Zorin, ka aktiv blogun për udhëtimet e tij dhe poston foto nga këto udhëtime.
TAKIMI” ME OFICERË
Babai i 23-vjeçarit Yuri Zorin pranon për mediat ruse se Mikhail u arrestua gjatë një proteste në mbështetje të Alexei Navalny, dhe më pas u dha një gjobë.
“Mikhail ka qenë qytetar aktiv, ndoshta nga klasa e njëmbëdhjetë. Ai gjithmonë mbështeti Alexei Navalny, shkoi në aksione që organizoheshin, ose nga Alexei Navalny, ose mbështetësit e tij. Dhe aksioni i fundit në të cilin mori pjesë Mikhail ishte më 31 janar 2021. Në përgjithësi, ishte koha që përkonte me kthimin e Alexei Navalny në Rusi. Në këtë tubim, Mikhail u ndalua, kundër tij u hartua një protokoll dhe u gjobit për pjesëmarrje në një tubim të paligjshëm”, thekson ai.
Në të njëjtën kohë, Yuri Zorin pretendon se nuk ka dëgjuar që shërbimet speciale ruse ishin përpjekur ndonjëherë të frikësonin dhe rekrutonin djalin e tij.
“Kishte një përpjekje për të vizituar shtëpinë nga oficerët e zbatimit të ligjit për të biseduar me Mikhail”, kujton ai. “Nuk e di kush ishin ata, nuk isha në shtëpi, ishte vetëm djali im i vogël. Ishte ai që u hapi derën. Pastaj doli që ata donin të flisnin me të për disa të dhëna personale të rrjedhura në rrjet. Ata sugjeruan të fajësonin Fondacionin ‘Navalny’ për mosmbrojtjen e këtyre të dhënave personale. Mikhail refuzoi të dëshmonte”, thotë ai për mediat ruse.
VAZHDO TË LEXOSH MË TEPËR PËR TEMËN
Duhet të jemi më seriozë se spiunët
