Kryeministri Edi Rama ka paralajmëruar edhe njëherë vendosjen e një takse “të jashtëzakonshme” për prodhuesit e energjisë elektrike.
Kreu i qeverisë nuk ka bërë të ditur asnjë detaj shtesë mbi taksën, teksa sqaron se të ardhurat që do të përfitohen prej saj, do të shkojnë në formën e ndihmave për pensionistët dhe familjet në nevojë.
Gjatë një takimi me qytetarët në Përmet, Rama shtoi se qeveria do të vijojë me rritjen e pagës minimale, por nuk dha asnjë afat se kur mund të realizohet.
Rama: Kemi hyrë në një nivel tjetër të kontekstit rajonal sepse me riadaptimin e TEC-it të Vlorës, përfshirjen e kompanisë amerikane me investimin për të lidhur tubacionin me atë të TAP-it, marrim një tjetër fuqi në vitet që vijnë. Kjo pjesa e energjisë elektrike duket si muhabet për kuriozitet pasi kur nuk ekziston si fakt në faturë, thonë që nuk është gjë. Por është një shpenzim shumë i madh. Jemi duke diskutuar për vendosjen e një takse të jashtëzakonshme për prodhuesit e energjisë.
Duke ndjekur direktivën europiane, do vendosim një taksë të jashtëzakonshme. Jo për të marrë një shumë të konsiderueshme fondesh në të ardhurat e shtetit dhe për t’i përdorur për asgjë tjetër përveçse për t’ua kthyer njerëzve në formën e mbështetjes financiare duke nisur nga pensionistët dhe familjet në nevojë. Në këtë përballje kaq të madhe, në këtë lloj monster, ne duam deri në fund të jemi solidarë.
I gjithë ai volum të ardhurash nga taksa e jashtzakonshme do kthehet në mbështetje sociale dhe të rezistencës së këtij populli ndaj inflacionit të luftës. Nga ana tjetër do bëjmë çmos rritjen e pagave ta vazhdojmë në mënyrë të qëndrueshme. Ta vazhdojmë për të vazhduar të stimulojmë sa më shumë jo vetëm njerëzit që punojnë në sektorin publik, por edhe atë privat. Do e rrisim përsëri pagën minimale në mënyrë që dhe sektori privat të bashkohet.
VAZHDO TË LEXOSH MË TEPËR PËR TEMËN
Cilat shtete kanë çmimet më të shtrenjta të energjisë elektrike?
Energjia, mes kursimit dhe shtrëngimit
