Prokuroria e Sarandës ka çuar në gjykatë ish-përgjegjësin e IKMT Sarandë, Julian Preni, i cili akuzohet për “shpërdorim detyre”. Hetimet fillestare për Prenin janë kryer nga SPAK për veprën penale “korrupsion pasiv”, raporton “BalkanWeb”. Por për shkak se nuk është arritur të provohet kjo vepër penale, dhe në bazë të dyshimeve se është konsumuar vepra tjetër “shpërdorim detyre”, dosja është transferuar në prokurorinë e Sarandës.
Julian Preni drejtoi IKMT-në e Sarandës në periudhën 2019-2020. Duke iu referuar të dhënave të sistemit gjyqësor, prokurori Kledian Llaho është ai që ka përfunduar hetimet dhe ka dërguar në gjykatë dosjen ndaj Prenit.
Seanca e parë për dërgimin e çështjes në gjyq është parashikuar të hënën, nën drejtimin e Suela Xhanit. Julian Preni akuzohet për “shpërdorim detyre” lidhur me disa raste të lejimit të ndërtimeve pa leje në territorin e Bashkisë Sarandë.
