Romeo Kara, ish-juristi i OSSH ka folur për dosjen e famshme “CEZ-DIA”, ku ka treguar gjithë zyrtarët e lidhur me Kastriot Ismailajn dhe dy dëshmitarët që po tronditin Ilir Metën në SPAK. Ai ka rrëfyer detaje për videon ku shfaqet gruaja Kastriot Ismailajt, Vojsava, e cila ka rrëfyer lidhjet e forta mes Ilir Metës dhe bashkëshortit të saj. Ajo ka treguar për vizitat familje dhe SMS-të që Meta i nisi Kastriot Ismailajt.
“Ilir Meta dhe bashkëshortja e tij, Monika, shpesh herë vinin në shtëpinë tonë….Mjafton që të shohësh SMS-të që Ilir Meta i dërgonte Kastriotit në vitet 2010, 2011 dhe e kupton lehtësisht këtë. Kastrioti ka qenë gjithashtu shpesh nën presion për të dhënë para nga bizneset e tij, për të ushqyer fushatat elektorale”, tha ajo. Pas këtyre deklaratave, Vojsava nuk pranoi të shprehej më për media, pasi kishte marrë kërcënime serioze. Në fund Romeo Kara ka treguar dhe personazhet që dyshohet se mund të jenë eliminuar nga ish-presidenti për shkak se kanë qenë në dijeni të aferave të Ilir Metës.
-Zoti Kara, a duhet që Vojsava Ismaili të dëshmojë për çështjen “CEZ-DIA”, pasi ju keni depozituar si provë vetëm një intervistë të saj?
Padyshim qe ajo duhet të merret në pyetje në mos është marre në pyetje. Kur unë kam dorëzuar si provë materiale atë intervistë, kam sqaruar çdo detaj rreth saj: kohën kur është bërë, ku është bere, gazetarin intervistues, personat e tjerë të pranishëm etj. Këto detaje janë të detyrueshme për t’u verifikuar si të vërteta në mënyre qe te mos cenohet autenticiteti i kësaj prove materiale. Intervista është dorëzuar nga unë tek Prokuroria e Krimeve të Rënda në fund të vitit 2017, vetëm pak ditë pasi e kam publikuar ne YouTube me asnjë ndërhyrje në të, në mënyrë që asnjë ekspert alla Meta të pretendojë më pas se ajo është e trukuar ashtu siç pretenduan për intervistën e Dritan Priftit. Intervista ishte realizuar në tre sekuenca filmike në një hotel të Vjenës ne 12 shkurt 2016 nga gazetari Fatos Mahmutaj.
-A duhet që ta thërrasë SPAK?
Kjo intervistë përmban thelbin e aferës ‘CEZ-DIA’ të konfirmuar nga vetë bashkëshortja e Ismailajt, prandaj pyetja e saj është mese e nevojshme. Në të kundërt SPAK-u ka të gjitha të dhënat e tjera për verifikimin e vërtetësisë së kësaj intervistë. Nëpërmjet sistemit TIM-s mund të verifikohet prezenca e personave që unë kam thënë në Vjenë si dhe të merren për bazë prononcimet e Fatos Mahmuajt, etj.
-Çfarë përmban kjo intervistë dhe a e rrezikon Ilir Meta?
Ne thelb kjo intervistë përmban një pohim nga ana e Vojsava Ismailat të asaj qe unë kam konstatuar se: kontrata DIA-CEZ është një aferë korrupsioni ku të dy palët kane bashkëpunuar për të favorizuar CEZ-in nëpërmjet politikave të ERE-s me çmimin e energjisë, duke dëmtuar dhjetëra miliona euro ne vit buxhetin e Shtetit Shqiptar. Kjo gjë është pohuar me vullnet të lire nga ana e saj, ne prani të avokatit të bashkëshortit të saj, ne një vend jashtë Shqipërisë, larg çdo presioni të pretenduar shtetëror dhe manipulimi të mundshëm.
-A mendoni se Ilir Meta me kërcënime dhe shantazhe mund t’ia mbylle gojën?
Mendoj se ai padyshim qe do të mundohet, në mos është munduar për t’i mbyllur gojën asaj dhe bashkëshortit të saj, ose ne pamundësi për ta bere ketë, t’i denigroje ato. Meta nuk është nga ata qe pajtohet me realitetin dhe të vërtetën kur nuk i leverdis atij. Ne dijeninë time Ismailaj ka pasur disa here vizita të miqve të Metës ne burgjet ku ka qene. Kjo gjë ngelet për t’u verifikuar nga SPAK-u.
-Kush është dëshmitari/ja qe Ilir Meta po e sulmon pas dëshmisë qe dha ne SPAK duke e quajtur të rreme?
Ai në realitet me ka sulmuar mua dhe Elvis Matën, si dy persona qe realisht po rrezikojmë më së shumti atë. Deri me tani na ka sulmuar dhe denigruar me çdo mjet ne heshtje, ndërsa tani edhe publikisht. Kjo flet për situatën e vështire në të cilën ai ndodhet. Ç’ka barku i tij, tani po ia nxjerr bardhaku. Ai ka menduar fillimisht se do t’ia dilte kësaj çështjeje në heshtje duke manipuluar procesin nëpërmjet artificave procedurale dhe kur e pa se nuk ia doli, filloi denigrimin tonë. Pretendoi jo pa qëllim se, ky kallëzim është bërë nga ana ime i shtyrë politikisht në vitin 2019 si kundërvënie ndaj procesit të inceneratorëve. Unë po ju deklaroj përsëri se kallëzimi im është bere zyrtarisht ne 18 Tetor 2017, pikërisht vetëm tre muaj pasi ai u zgjodh president me votat unanime të PS. Ky kallëzim i imi u paralajmërua pikërisht me anë të një shkrimi satirik që unë kam bërë në 24 Korrik 2017 ditën qe ai u inaugurua si president, pasi pikërisht atë ditë unë jam vënë ne dijeni nëpërmjet një telefonate nga gazetari Fatos Mahmutaj lidhur me ekzistencën e kësaj interviste dhe përmbajtjen e saj.
Ju mund t’i referoheni këtij shkrimi. Këtë gjë e kam theksuar edhe përpara prokurorisë edhe në një intervistë televizive pikërisht më 18 Tetor 2017. Sqaroj gjithashtu se, Elvis Mataj deklarimet e tij kundra Metës i ka dhënë fillimisht në qershor 2014 përpara avokatëve të Clifford Chance në Munih të Gjermanisë, shumë kohë përpara se ai të kishte probleme me prokurorinë siç aludon Meta. Asnjë ndërhyrje favorizuese nuk ka pasur nga ana e Shtetit Shqiptar ne prokurori pro Elvis Matajt. Çdo pretendim i Metës karshi tij është thjesht një diversion manipulativ për të denigruar argumentuesin në pamundësi për t’u përballur me argumentin. Duke e njohur mire Metën, këto sulme i shkojnë për shtat pikërisht kallupit të tij dhe hallit të tij, por jo cenimit të integritetit të procesit. Kallëzimi im dhe deklarimet e Elvis Matajt janë bërë me qëllimin më të mirë në funksion të mbrojtjes se pasurive publike dhe vendosjes se drejtësisë.
-Çfarë provash ka tjetër për Ilir Metën?
Në 2010 DIA tenton të lidhë marrëveshje. DIA e krijuar nga njeriu i Metës për të mbledhur borxhet e CEZ. Mori punonjës të CEZ, ambientet e CEZ në shumë raste. U hoqën njerëz nga puna me dhunë në CEZ dhe i mori DIA. Ato borxhe shumë pak do mblidhet DIA, ishin krijuar fiktivisht, ky target do kalonte 50% te CEZ dhe gjysma tjetër te DIA, Kontrata nuk u kalua dhe atëherë hyri në lojë edhe Meta, ka patur kontradiktë këtu me Dritan Priftin. Meta ka bërë vizitë zyrtare me Ismailajn në Pragë, TIMS mund ta vërtetojë. E ka prezantuar si “vëllai im”. Siç thotë gruaja e Ismailajt në intervistë, unë kam aplikuar për uljen e çmimit të energjisë elektrike për të favorizuar CEZ. Pas këtyre veprimeve, CEZ e miraton marrëveshjen në 11 shkurt 2011. Në nëntor 2011 kur prishet marrëveshja me CEZ, rritet çmimi i energjisë nga ERE. Oligarkët më të mëdhenj që ka Shqipëria janë të përfshirë aty, kanë marrë 19 mln USD. Meta del që është miku i këtij, ka shkuar në Pragë të prezantojë Ismailajn dhe t’i zgjidhë problemin e kontratës. Nuk lëviz ai pa interes. Sot Meta e pranon që vendimi i ERE ishte i paligjshëm. Vetëm në një dorë ka marrë 10 mln euro. 200 mln lekë në një çantë i janë çuar Metës në shtëpi, e ka thënë Ervis Mata. Provat më të shumta i kam gjetur në vitin 2014-2015 me e-mailet, me një grup emailesh, pasi u bë marrëveshja e kalimit të aksioneve nga CEZ te shteti shqiptar na kanë ardhur mijëra email-e, gabimisht i kanë dërguar në grup dhe na kanë ardhur shumë materiale,. “Takova Ilirin” “Tani mori fund kërcënim i Ismailajt ndaj nesh, me lidhjet e tij politike”…. Ajo që i vuri kapakun është marrja e materialit ditën që u bë president Meta më erdhi dokumenti nga Fatos Mahmutaj… Pastaj ka pasur një transferim zyrash të OSHEE, kam marrë një material e kam kompresuar dhe kam nxjerrë atë material. Kur e ka marrë Dumani kam thënë që ky do bëjë maksimumin e mundshëm.
-Një ngjarje të cilën ju e keni përmendur, por që mendoj ka vend për sqarim është zhdukja e dëshmitarëve kyç të aferës së CEZ apo CEZ-DIA. Çfarë ka ndodhur me Belegun, Tepshin, etj.?
Eduart Belegu zhduket pikërisht pasi ftohet për kafe nga një njeri i afërt me Metën. Qazim Tepshi, ish-ambasadori i Shqipërisë në Çeki, ndërron jetë papritur, në mënyrë të dyshimtë, pikërisht pak pasi u ftua për kafe nga një tjetër njeri i afërt i Metës. Kjo ngjarje ndodhi në gushtin e vitit 2015, menjëherë pasi miku i Metës i aferës DIA-CEZ, Kastriot Ismailaj, u arrestua dhe filloi të hapë gojën në mënyrë kërcënuese për Metën nga burgu, duke ngritur një furtunë kundër tij në Parlament dhe në media. Qazim Tepshi, ishte një kërcënim për Metën, pasi ai ka qenë në dijeni që në fillim të aferës CEZ-DIA dhe kishte kohë që kishte shfaqur pakënaqësi ndaj Metës dhe Ismailajt, lidhur përsa më sipër. Ishte Qazim Tepshi ai që me porosi të Metës, ofroi pranë stafit drejtues të CEZ-it, Kastriot Ismailajn, duke e prezantuar si një njeri të afërt dhe të besuar të Metës. Këtë fakt e konfirmon në dëshminë e tij ish-kryetari i bordit të drejtorëve të CEZ-Shpërndarje, Jozef Hejsek. Qazim Tepshi është aksidentuar me makinë në Pragë për llogari të Metës, pikërisht kur Meta dhe Ismailaj vizituan së bashku Pragën në fund të vitit 2010, me qëllimin që ai të mos ishte i pranishëm në takimin dypalësh: Meta-Ismailaj & Roman-Pleskash, takim në të cilin u bënë disa marrëveshje mafiozo-korruptive. Pak ditë para këtij takimi, Ismailaj u pagua me urgjencë nga CEZ-i për punë të pakryera asnjëherë, me rreth 1.5 milionë euro, para të cilat dyshohet se u paguan në funksion të këtij takimi. Pak ditë pas këtij takimi, ERE, në ndikimin e Metës dhe Berishës, miratoi një vendim lidhur me uljen e çmimit të shitjes së energjisë elektrike nga KESH-i tek CEZ-i, vendim i cili rëndoi minimalisht me 30 milionë euro në vit buxhetin e shtetit.
-Çfarë njohjesh keni ju me Kastriot Ismailajn dhe si është historia e Kongos?
Fillimisht me të kam pasur njohje nëpërmjet të tretëve nëpër kafenetë e Tiranës. Në lidhje me bëmat e Kongos, unë kam dijeni si me poshtë: Ekziston një artikull i gjatë në Neue Zurcher Zeitung në 2009 i cili hedh dritë mbi veprimtarinë e kompanisë “United Resources AG”, kompani e zotëruar 98% nga Ismailaj në minierën e zinkut në Kipushi të Kongos. Këtë minierë ai e mori me një qera 30 vjeçare duke marrë përsipër realizimin e një studimi realizueshmërie paraprake të saj, si dhe një financim prej qindra milionë eurosh në këtë minierë (221 deri në 420 mln USD). Aty ai paraqiti si degë të “United Resources” edhe “AIC Sh.p.k” e cila zotërohej po prej tij dhe me demek kishte përvojë në fushën minerare si dhe mijëra punonjës si staf. Gjithkush e di, se një kompani e tillë ekziston vetëm në letër në Shqipëri. Këtu ai u lidh me CEZ-in ndërsa në Kongo pazarin e beri me kompaninë shtetërore të minierave Gecamines. Aq shume ra në sy afera e tij ne Kongo, sa në Parlamentin Kongolez u krijua Komisioni Zyrtar për Shqyrtimin e Kontratave te Minierave, pasi rezultoi një zhveshje tërësore e shtetit nga pasuritë e tij të dhëna me qira qesharake apo koncesione.
Ky komision mori vendimin që kontrata me Ismailajn të rinegociohet. Ismailaj ishte fare pa risk në këtë kontratë dhe me detyrime gati të papërfillshme. Qiraja që ai paguante ishte 0.5% e xhiros. Kjo qira zvogëlohej edhe më tepër pasi në kontratë parashikohej që Ismailaj të rimbursohej për të gjitha borxhet e tij. Pra, për sa kohë miniera do të rezultonte pa fitim, Ismailaj nuk do të kishte detyrime në lidhje me pagesën e qerase. Komisioni parlamentar kongolez konstatoi se detyrimet kryesore kontraktuale të palëve janë vendosur arbitrarisht. Ismailaj hyri në tenderin e minierës në Kongo duke mashtruar sikur kishte mbi 6000 punëtorë dhe në dispozicion 420 mln USD. Sipas verifikimeve në regjistrat zvicerane kompania United Resources AG nuk ka ekzistuar në kohën e marrëveshjes për minierën me 14 shkurt 2007. Fillimisht kompania është regjistruar si Dominicus AG me 1 shtator 2006 dhe pastaj ka ndryshuar emrin në United Resources AG në 22 prill 2008. Në kohën që u bë marrëveshja ekzistonte vetëm United Resources Holding AG e pastaj United Resources te Kipushit Holding AG. Komisioni kongolez pati shumë vështirësi në vlerësimin e sakte se si ishte shndërruar disa herë kompania e Ismailajt. Duke bërë krahasimet me veprimet e tij në Shqipëri, unë them se ai ka vepruar fillimisht në Kongo në emër të një kompanie, të cilën ai e ngriti më vonë vetëm për këtë qëllim ashtu si dhe DIA-n.
Në rastin DIA ai përdori emrin e mirë të kompanisë DAI në USA ndërsa në rastin e United Resources AG ai përdori emrin dhe reputacionin e kompanisë East Point Holding të grupit La Point për të fituar kredi për vete. Edhe 21 muaj pas nënshkrimit të marrëveshjes për minierën, Ismailaj nuk investoi apo punoi aspak atje. Ai bëri një manovër tjetër financiare duke i shitur kontratën United Resources Kipushi LTD, një kompanie të drejtuar nga sipërmarrësi Dan Gertler. Pra ai dështoi të respektoje kontratën me shtetin kongolez dhe sipas Global Witness e cila ka realizuar një investigim për Sales Secret, Ismailaj mori 30 mld USD kredi, nga të cilat i ka paguar shtetit kongolez vetëm 10 mln USD. Rezulton një shumë prej 20 mln USD që nuk justifikohet nga Ismailaj. Megjithatë rruga e investigimit për në Kongo, është e hapur.
VAZHDO TË LEXOSH MË TEPËR PËR TEMËN
