Vrasësi i Pragës, i cili qëlloi për vdekje 13 persona ndërsa sulmoi Universitetin Charles të enjten (21/12) thuhet se ishte një student introvert, i fiksuar pas historisë. Daily Mail raporton se ai ishte i fiksuar pas armëve, pasi dyshohet se kishte ndërtuar “një bombë të bërë vetë” në bodrumin e shtëpisë së tij.
Bilanci i sulmit të armatosur vdekjeprurës të djeshëm në Universitetin Charles në Pragë është 14 të vdekur, përfshirë edhe autorin e sulmit. Nuk ka të huaj në mesin e të vdekurve, njoftoi ministri i Brendshëm çek Vit Rakuzan në televizionin çek.
Kush është vrasësi i Pragës?
David Kozak, 24 vjeç, i përshkruar si student model, vrau 13 persona dhe plagosi 25 në sulmin vdekjeprurës të djeshëm në të cilin ai synonte studentët dhe turistët nga ballkoni i godinës së Fakultetit Filozofik të Universitetit të Charles.
Para masakrës në universitet, studenti i Historisë kishte vrarë të atin teksa i dërgonte mesazh të dashurës së tij për t’i thënë se po vriste veten.
Një burim policor tha për La Stampa se pajisja e gjetur e improvizuar përbëhej nga “një cilindër, municione, materiale piroteknike dhe kimikate”.
“Bodrumi ishte si një bunker. Shishja ishte e madhe, kishte shumë tela të lidhur me të, duke çuar në pajisje të tjera. Sipas mendimit tim, ai përmbante një sistem që do të shkaktonte një shpërthim”, tha një burim pranë hetimit.
Më shumë detaje po dalin edhe për Kozakun, me ata që e njihnin duke e përshkruar atë si një “njeri” introvert që ishte i magjepsur nga armët dhe urrente botën. Kozak, i cili ishte student i diplomuar në histori në Universitetin Charles, kishte përfunduar tezën e tij universitare mbi historinë polake të shekullit të 19-të.
‘Kam dashur gjithmonë të vras dikë’
Mesazhet e postuara nga i riu në Telegram javët e fundit japin një pamje krejtësisht të ndryshme nga ajo e studentit i cili dukej i qëndrueshëm dhe i zellshëm.
Studenti 24-vjeçar i Shkollës Filozofike të Universitetit Charles ishte ankuar për “jetën e tij të mjerueshme” dhe kishte shkruar ndër të tjera se “gjithmonë donte të vriste dikë”.
Në një mesazh të datës 10 dhjetor, sulmuesi shkroi se ishte “shumë i frymëzuar nga Alina”. Ai e kishte fjalën për 14-vjeçaren Alina Afanaskina. Vajza qëlloi dhe vrau dy persona në shkollën e saj në qytetin rus të Bryansk më 7 dhjetor dhe më pas vrau edhe veten.
“Por Alina nuk vrau mjaftueshëm njerëz, do ta rregulloj”, kishte shkruar Kozak.
“Dua të sulmoj një shkollë dhe ndoshta të vras veten. Alina Afanaskina më ndihmoi. Gjithmonë kam dashur të vras, kam menduar se në të ardhmen do të bëhem maniak. Ishte më fitimprurëse sulmi masiv sesa ai serial. U ula, prita, pata ëndërr”, dyshohet se ka shkruar ai ndër të tjera
“Paroksizmi” i tij vrasës nisi me babain e tij, i cili u gjet i vdekur.
“Ai ishte një djalë introvert, mjaft i çuditshëm si çdo budalla tjetër”, tha një banor për mediat lokale.
“Familja dukej normale. Ne shkuam në vilën e tyre vite më parë. Babai i tij ishte shefi im dhe ata ishin miq jashtë punës, përfshirë gruan e tij”.
Është ende e paqartë se çfarë ka ndodhur saktësisht mëngjesin e 21 dhjetorit. Ajo që vërtetohet është se Kozak vrau babanë e tij përpara se të shkonte në Pragë.
Policia çeke mësoi se ai po shkonte drejt kryeqytetit dhe planifikonte të vriste veten.
Kronikë e sulmit
Skenat e çmendurisë bënë xhiron e botës, me studentë të Shkollës së Arteve të Bukura të Universitetit Charles në Pragë “të varur” dhe kërcyer nga dritaret për t’i shpëtuar tërbimit vrastar të David Kozak.
“Jam i tronditur nga kjo ngjarje… Unë do të doja të shpreh trishtimin tim të thellë dhe ngushëllimet e sinqerta për familjet dhe të dashurit e viktimave të të shtënave”, tha Pavel në një postim në X.
Policia çeke njoftoi në Tëitter se dje pak pas orës 15:00 me orën lokale (16:00 me orën greke) forcat e saj janë mobilizuar për një incident të ndodhur në një institucion arsimor në sheshin Jan Palach të kryeqytetit çek.
Personi i armatosur hapi zjarr në katin e katërt.
“E gjithë ndërtesa është evakuuar. Në vendngjarje ka pasur shumë të vdekur dhe dhjetëra të plagosur”, njoftoi fillimisht policia.
Në përpjekje për t’i shpëtuar sulmit, disa studentë dolën nga dritaret dhe u varën në parvaz.
VAZHDO TË LEXOSH MË TEPËR PËR TEMËN
Masakra në Universitetin e Pragës/ Identifikohen viktimat nuk ka shqiptarë dhe italianë!
