Drejtori i Përgjithshëm i Burgjeve, Admir Abrija ka dhënë dorëheqjen nga posti.
Mësohet se Admir Abrija i ka dorëzuar dorëheqjen Ministrit të Drejtësisë, Ulsi Manja.
Vendimi i tij për tu larguar nga detyra do të shqyrtohet në mbledhje qeverie.
Admir Abrija mban postin e Drejtorit të Përgjithshëm të Burgjeve prej dhjetorit të vitit 2021.
Ai u zgjodh në këtë post të rëndësishëm me propozim të ministrit të Drejtësisë Ulsi Manja pas lirimit nga detyra të Agim Ismailit.
Por, kush është Admir Abrija?
Admir Abrija ka mbajtur një sërë postesh të rëndësishme, nga Garda e Republikës, te Dogana e deri si Prefekt i Tiranës. I diplomuar për drejtësi, Abrija ka edhe licensën e avokatit. Ai ka punuar si oficer sigurie i Gardës së Republikës në vitin 1999, dhe më pas është bërë zëdhënës i këtij institucioni.
Më vonë, ka punuar si Shef Sigurie në Presidencë, në kohën kur ky institucion drejtohej nga Bamir Topi. Ai ka shërbyer edhe në radhët e policisë, ku ka mbajtur edhe postin e drejtuesit, mes të cilave edhe Drejtorinë e Kufirit në Gjirokastër.
Më tej, Admir Abrija u emërua zëvendësdrejtor i Përgjithshëm i Doganave, ku kishte nën varësi sektorin e antikorrupsionit dhe hetimit. Pas këtij posti, ai do të emërohej si Prefekt i Tiranës, ndërsa sot i është besuar Drejtoria e Burgjeve.
