Wolves ka ndalur Manchester City-in në shtëpi. Takimi i luajtur në “Molineux Stadium” është mbyllur në barazim 1-1. Pas dy fitoreve të marra në dy ndeshjet e para, skuadra e Pep Guardiola nuk ka arritur të marrë pikët e plota në javën e tretë dhe tani rrezikon të humbasë kryesimin e renditjes. Kjo ndeshje ka qenë historike për Vincent Kompany, që është bërë belgu i parë me 250 ndeshje në Premier League.
Në minutën e 20-të kanë qenë vendasit ata që kanë gjetur golin me Raul Jimenez, por arbitri e ka anuluar për një pozicion të dyshimtë jashtë loje.
Ndeshja ka qenë me një ritëm të lartë dhe me raste nga të dy ekipet, si ai i Aguero-s në minutën e 21-të, me topin që është ndalur nga shtylla. Një minutë më vonë ka qenë Sterling që ka provuar të realizojë një gol të jashtëzakonshëm nga një distancë e largët, por pritja e Rui Patricio ka qenë po aq e bukur.
Pjesa e dytë ka vazhduar me të njëjtat ritme dhe ndeshja është zhbllokuar në minutën e 58-të nga mbrojtësi i vendasve, Willy Boly, por imazhet kanë treguar se lojtari e ka devijuar topin në rrjetë pas një prekje të pavullnetshme të topit me dorë.
Lojtarët e Guardiola kanë rritur sulmet pasin kanë kaluar në disavantazh dhe kanë arritur të gjejnë golin e barazimit në minutën e 69-të me një goditje të fuqishme me kokë të mbrojtësit francez, Aymeric Laporte. Ky ka qenë edhe goli i parë i tij në 36 ndeshjet e fundit të luajtura në La Liga dhe Premier League. Gjithashtu, ky ka qenë goli i 1.500-të i realizuar nga një francez në kampionatin anglez.
“Qytetarët” kanë dominuar minutat e fundit të takimit dhe kanë shkuar shumë afër golit të dytë me Gabriel Jesus, i cili është ndalur nga një tjetër pritje shpëtimtare e portierit të vendasve. Në fund ka qenë traversa që i ka mohuar Sergio Aguero-s golin dhe fitoren Manchester City-it.
