Ardimir Murataj, një djalë nga Fieri, për shkak të stresit të përditshëm prej papunësisë kishte dalë për peshkim. Fati e deshi që të ndodhej aty në momentin kur një nënë e dëshpëruar dhe e marrosur po përpiqej të mbyste dy vajzat e saj të mitura. Ardimiri ndërhyri në momentin kritik, duke shpëtuar vajzat nga vdekja dhe për një çast nënën nga marrëzia.
Disa media e kanë pasqyruar ngjarjen duke theksuar humanizmin, por edhe njerëz të ndryshëm në rrjete sociale e kanë përgëzuar heroin e ditës. Ndërsa ATA, të rëndësishmit e vendit, përfaqësuesit “de jure” të popullit, janë me pushime dhe mungesa e valëve të telefonit nuk i lejon të shkruajnë as ndonjë status e as të lëshojnë ndonjë urdhëresë rasti. Ose ndoshta janë ende duke testuar tregun e reagimeve publike, që të pozicionohen sipas interesit publik në mënyrë që të marrin edhe ata pakëz lavdi.
Nëse Ardimiri do t’i kishte shpëtuar dy vajzat me jahtin e tij luksoz, qeveritarët të ndjekur nga kameramanët e tyre personalë do të kishin vrapuar ta takonin e përgëzonin, e më pas të drekonin me heroin e ditës. Ose do duhej që viktimat të kishin një histori më pak fatkeqe sesa ajo e një drame familjare që dikush atje lart të denjonte të shkruante ndonjë status.
Por heroi, Ardimiri qëlloi një i ri i papunë, i cili nuk i plotëson kriteret e antiheroit që sot nderohet në Shqipëri dhe viktimat qëlluan bija të prindërve në krizë të thellë, të braktisur prej shtetit në hallin e tyre.
Sepse sot duhet të jesh me rekorde kriminale, me një dosje të hapur, me ca bodiguardë pas vetes, i shpallur në kërkim, deputet, kryetar bashkie, këshilltar, politikan apo doktor shkencash falso që të marrësh vëmendjen apo medaljen e mirënjohjes.
Duhet të lëpihesh si një kërmill i përjetshëm ose të vraposh si një lepur i frikësuar për të qenë në rrezen e shikimit të dikujt që i peshon urdhri më tepër sesa truri dhe zemra.
E në këto kushte na mbetet veç të falenderojmë dhe urojmë Ardimirin e njerëzishëm që t’i shkojë jeta mbarë e të mos humbë shpresat. Ndoshta kryetari i Bashkisë së Fierit apo të tjerë, do duan ca publicitet meqënëse zgjedhjet po afrojnë.
Jeta Toçilla Dedja
