Me një aktivitet të veçantë për të promovuar vlerat e Xhubletës, mbretëreshës së veshjes së femrës shqiptare, Drejtoria Rajonale e Trashëgimisë Kulturore në Shkoder, çeli veprimtaritë e “Ditës Kombëtare të Turizmit” dhe të “Ditëve të Trashegimisë Kulturore Evropiane”.
Studiuesit kanë provuar se xhubleta është një veshje me mbi 4000 vite histori, ndaj konsiderohet si një libër i hapur i epokave historike, theksoi në fjalën e saj, drejtoresha e Trashëgimisë Kulturore, Majlinda Laçaj:
“Xhubleta është një identifikim i Shqiptarëve dhe historisë tonë.
Ajo ka një strukturë të pasur artistike e stilistike dhe është si një libër që gjen një thesar të madh.
Me plot të drejtë nga studiuesit e ndryshem konsiderohet si veshja me e vjetër në botë për gratë të cilen e gjejmë ende gjallë në veriun e Shqipërise dhe në trevat shqipfolëse.”
Etnografja e mirënjohur, Afërdita Onuzi, tregon se xhubleta e alpeve shqiptare është pjesë e identitetit tonë kombëtare dhe vlerë e jashtëzakonshme e trashëgimisë kulturore evropiane, me një dekoracion shume te veçantë:
“Është padyshim një thesar për historinë dhe rrënjet tona ilire.
Në xhubletë gjen kodet më intriguese dhe të shkruar aty kujtesën historikë të të parëve tonë”
Sot njihen 40 lloje të xhubletave të arkivuara në Shqipëri, Kosovë, Serbi, Mali i Zi dhe në Paris.
Nga studiuesit kërkohet që xhubleta të vlerësohet si vlerë e kulturës botërore dhe te mbrohet nga UNESKO.
