Mbrëmjen e kësaj të premteje, kryeministri Rama ishte i ftuar në “Zonë e Lirë” të moderatorit Arjan Çani, ku ndër të tjera, ai foli edhe për çështjen e mbylljes së lojërave të fatit nga 1 janari.
Gazetari iu drejtua kryeministrit duke e kundërshtuar për këtë vendim, por Rama ngulmoi në idenë e tij, duke u shpreh se ajo është e duhura dhe është në favorin e qytetarëve, që sipas tij, tashmë një pjesë e madhe e meshkujve janë të “sëmurë” nga bastet.
Më tej, ai iu drejtua Çanit duke i thënë se të pyesë njëherë zonjat e ftuara në publikun e emisionit dhe nëse ndonjëra nga ato do të shprehej se lojërat e fatit të qëndrojnë të hapura, atëherë, tha Rama, nuk do t’i mbyllim.
Ai vazhdoi më tej, duke thënë se janë pikërisht gratë ato që e vuajnë më shumë këtë fenomen. Kryeministri tha se gratë duhen pyetur gjithmonë. “Unë jam shumë mirë se pyes gruan”, u shpreh kryeministri.
Por Arjan Çani reagoi duke u shprehur mosbesues në këtë deklaratë: “Ti bën kot se nuk pyet askënd”, tha gazetari.
