-Kosovë
Me 101 vota për, deputetët e Kuvendit të Kosovës kanë votuar në lexim të parë Projektligji për Ministrinë e Mbrojtjes, ndërsa me 98 vota ka kaluar Projektligji për formimin e Ushtrisë së Kosovës.
Këto projektligje, parashohin që Forca e Sigurisë së Kosovës të zhvillohet si një forcë me kompetenca dhe detyra të reja, organizim dhe funksionim të ri dhe kalimi i Ministrisë së FSK-së në Ministri të Mbrojtjes.
-Maqedoni
Me vizitën e anëtarëve të Komitetit për Anëtarësim dhe Komitetit të Punës për Integrim në NATO, të enjten në Bruksel do të fillojnë bisedimet për anëtarësimin e Maqedonisë në këtë organizatë.
Maqedonia në Samitin e NATO-së në Bruksel në muajin korrik edhe zyrtarisht mori ftesë për anëtarësim, ndërsa hyrja u kushtëzua me zbatimin e Marrëveshjes së Prespës.
-Kosovë
Presidenti i Kosovës, Hashim Thaçi, e ka dekoruar me medaljen “Qytetare e merituar e Kosovës”, Vasfije Krasniqi-Goodnam.
Krasniqi ditë më parë e ka rrëfyer tmerrin që ia shkaktuan serbët kur e përdhunuan në moshën 16 vjeçare gjatë luftës së fundit në Kosovë.
-Greqi
Kryeministri grek, Aleksis Tsipras, i ka bërë apel Maqedonisë për miratimin e emrit të nënshkruar nga të dy vendet duke deklaruar se nuk do të kishte një mundësi tjetër për Shkupin.
Emri i ri i pranuar nga qeveritë e Shkupit dhe Athinës është Maqedonia e Veriut.
-Maqedoni
Deputeti Artan Grubi nga Bashkimi Demokratik për Integrim vlerëson se nuk është e nevojshme mbajtja e zgjedhjeve të parakohshme parlamentare në Maqedoni.
Sipas tij, të gjithë 120 deputetët duhet të votojnë për zbatimin e Marrëveshjes së Prespës, pasi që siç thotë të gjithë deputetët kanë premtuar se do ta integrojnë vendin në BE dhe NATO. /Konical.al/
