Në një atmosferë elektrizuese me mijëra e mijëra tifozë të arteve marciale, rusi Khabib Nurmagomedov dhe irlandezi Conor McGregor, pak orë para duelit që do të zhvillojnë për titullin kampion të peshës së lehtë në eventin UFC-229 (në orët e para të mëngjesit të 7 tetorit me orën shqiptare), kanë zhvilluar edhe një dalje të fundit publike.
Në “T-Mobile Arena” të Las Vegasit, ku do të zhvillohet ky event, kanë dalë të gjithë sportistët që do të duelojnë në UFC-229. Por “qershia mbi tortë” ishte padyrisht momenti kur në skenë janë ngjitur njëri pas tjetrit dy sportistët.
I pari u ngjit irlandezi McGregor, që kreu edhe peshimin e fundit zyrtar e pas tij kampioni në fuqi, rusi Nurmagomedov. Pasi u peshuan ata dolën “face to face”, por në këto momente tensioni ka qenë i lartë dhe nuk kanë munguar përpjekjet për t’u kapur fizikisht.
Madje McGregor tentoi edhe ta godiste me shkelm Nurmagomedov, por që në momentin e parë ndërhynë stafet e dy sportistëve, si dhe presidenti i UFC-së, Dana White. Kjo dalje e fundit publike ishte e hapur për mijëra fansa, që kishin paguar biletën për të qenë të pranishëm në këtë moment.
Madje kjo sfidë mes McGregor dhe Nurmagomedov konsiderohet si sfida më e madhe e historisë së UFC-së, që mendohet se do të kalojë shifrën e 3 milionë PPV (pay per vieë-paguaj për ta parë).
VAZHDO TË LEXOSH MË TEPËR PËR TEMËN
Nurmagomedov-McGregor, dueli famoz i UFC-së
