Një ngjarje e rëndë ndodhi dje në Fier, kur sherri i momenti mes dy adoleshentëve në Fier përfundoi tragjikisht për jetën e njërit prej tyre.
Ndërkohë sot të tjera detaje dalin: 16- vjeçari nga fshati Hoxharë e Vjetër, i cili u qëllua me thikë në zemër nga një 17-vjeçar nga qyteti i Fierit rreth orës 16:30 në vendin e quajtur “Zogu i Zi” në qendër të Fierit, ka ka qenë duke pritur në një stacion autobusin për t’u rikthyer në fshatin e tij, kur është konfliktuar për motive banale me bashkëmoshatarin e tij, F.Gega.
Pas një sherri verbal mes tyre, ata janë konfliktuar edhe fizikisht dhe 17- vjeçari ka nxjerrë një thikë, duke e qëlluar për vdekje.
Sipas të dhënave, pas konfliktit verbal e më pas fizik mes tyre, autori ka nxjerrë thikën, duke e qëlluar 16- vjeçarin dhe më pas është larguar direkt nga vendi i ngjarjes.
Tehu i thikës i ka prekur zemrën viktimës e për pasojë ai ka qëndruar në jetë vetëm disa minuta pas ngjarjes. Ai është dërguar me shpejtësi në Spitalin e Fierit, por plaga në organin jetësor ka qenë fatale e për pasojë viktima ka ndërruar jetë.
Policia ka marrë në pyetje dëshmitarë të shumtë në vend, të cilët kanë pohuar se sherri kishte nisur për motive krejt banale, “kush je ti e kush jam unë”. Më pas ata janë përleshur dhe njëri prej tyre ka nxjerrë thikën duke e qëlluar.
Sipas të dhënave, viktima ishte nxënës në vitin e dytë në gjimnazin e fshatit Hoxharë. Ditën e djeshme ai bashkë me disa shokë të tij kanë dalë në qytet për të pirë kafe në një nga lokalet e saj dhe më pas në orët e drekës do të ktheheshin në banesat e tyre.
Në momentin e ngjarjes, 16-vjeçari ka qenë duke pritur në stacion autobusin, kur në rrethana ende të paqarta është konfliktuar me bashkëmoshatarin e tij.
Sipas burimeve, adoleshenti ka qenë me tre shokë të tij, por asnjëri nuk ka mundur të ndërhyjë për të shmangur tragjedinë, pasi autori ka vepruar shpejt dhe askush nuk e ka parashikuar dot se ai mund të kishte armën e ftohtë me vete.
Pas krimit të rëndë, 17- vjeçari është larguar me shpejtësi, duke humbur gjurmët. Menjëherë pas identifikimit, Policia ka shkuar në banesën e tij, por familjarët kanë mbetur të tronditur kur kanë mësuar atë çfarë kishte ndodhur me protagonist djalin e tyre.
Babai i 17-vjeçarit, F.Gega, ka bashkëpunuar me Policinë dhe pasi ka arritur të lidhej nëpërmjet telefonit me të birin, e ka bindur atë që të vetëdorëzohej. Sipas Policisë, në orët e darkës, adoleshenti është paraqitur bashkë me të atin në Drejtorinë e Policisë së Fierit, ku edhe ka pranuar krimin e rëndë.
Sipas burimeve të Policisë, ai nuk është marrë në pyetje deri në orët e vona, pasi ishte mjaft i tronditur psikologjikisht dhe i pamundur për të dhënë një dëshmi të qartë në lidhje me ngjarjen që kishte ndodhur.
Ai vetëm sa ka pranuar autorësinë, duke thënë se nuk kishte dashur ta vriste dhe se gjithçka kishte ndodhur pa paramendim në një moment konflikti të çastit.
