MENU
klinika

Intervistë/ Dr. Benarda Beqaraj

A dëmtohen dhëmbët tuaj nga fasetat?

05.11.2018 - 15:53

1. Çfarë janë fasetat e dhëmbëve?

Fasetat janë punime protetike shumë estetike. Vitet e fundit është rritur kërkesa për buzëqeshjen perfekte dhe dhembet e bardhë. Fasetat na ofrojnë përparësi dhe nuk janë shumë invasive për shëndetin e dhëmbëve.

Me një prekje të lehtë të sipërfaqes së dhëmbit ne mund të ndryshojmë formën, ngjyrën, të mbyllim hapësira e të rregullojmë imperfeksione të dhëmbëve.

2. Përse fasetat janë bërë kaq të preferuara kohët e fundit?

Secili prej nesh do të dëshironte dhëmbë të bukur e të bardhë. Goja ndodhet në mes të fytyrës dhe është e para që vihet re kur shikojmë një person.

Buzëqeshja është një tipar shumë tërheqës. Fasetat japin mundësinë për të pasur buzëqeshjen e ëndërruar në një kohë të shkurtër dhe pa cënuar rëndë strukturat dhëmbore.

3. Sa lloje fasetash ka?

Fasetat janë dy llojesh. Fasetat direkte janë ato të cilat mund të ndërtohen në klinikë me material kompoziti. Ato mund të përgatiten në një seancë dhe pacienti brenda ditës del me një buzëqeshje të re.

Fasetat indirekte ndërtohen në laborator me materiale më rezistente dhe shumë estetike si porcelani e litium disilikati.

4. Cilat janë avantazhet dhe disavantazhet e fasetave të porcelanit në krahasim me ato të kompozitit?

Fasetat e kompozitit kanë disa përparësi, por kryesorja është kostoja. Ato kushtojë 3 ose 4 herë më pak se fasetat e porcelanit. Avantazh tjetër i këtyre lloj punimeve është koha, ato përgatiten brenda ditës.

Fasetat indirekte të porcelanit kërkojnë kohë më të gjatë sepse përgatiten në laborator. Fasetat e kompozitit ruajnë më tepër dhëmbët dhe janë më pak invazive.

Avantazhet kryesore të fasetave të porcelanit janë estetika dhe kohëzgjatja e punimit. Disavantazhi i fasetave te kompozitit është koha më e shkurtër e mbajtjes dhe estetika e kufizuar në raport me fasetat e porcelanit. Këto të fundit janë shumë natyrale dhe kënaqin pritshmëritë e pacienteve për kohë më të gjatë.

5. Sa zgjat saktësisht kjo procedurë?

Fasetat e porcelanit kërkojnë kohë më të gjatë, ato përgatiten në laborator dhe përpunohen në aparate të sofistikuar si cad-cam. Gjatë kësaj kohe pacienti do të mbajë faseta provizore. Puna përfundohet brenda një jave.

6. Çfarë kujdesi duhet të ketë një pacient pasi ka vendosur fasetat?

Pacientët që kanë faseta, por edhe punime të tjera protetike në gojë duhet të kenë higjienë maksimale. Rekomandohet larja e dhëmbëve dy herë në ditë, pastrimi i hapësirave interdentale dhe përdorimi i shpëlarësit të gojës. Çdo 6 muaj rekomandohet pastrimi i thellë profesional tek dentisti.

Dr. Benarda Veli Beqaraj – Stomatologe

7. A konsumohen fasetat me kalimin e kohës?

Si çdo punim tjetër protetik fasetat nuk janë për gjithë jetën. Ndryshimet fiziologjike kërkojnë që këto punime të ndryshohen pas një kohe të caktuar.

Fasetat e kompozitit janë më delikate dhe me kalimin e kohës ndryshojnë ngjyrë dhe formë. Fasetat e porcelanit janë më të forta dhe rezistente në kohë.

8. Kur rekomanohet zëvendësimi i fasetave?

Fasetat e kompozitit rekomandohen të ndërrohen pas 5-7 vitesh. Porcelani është material shumë më rezistent se kompoziti dhe nëse mirëmbahen këto punime mund të shkojnë nga 10-15 vjet.

 

VAZHDO TË LEXOSH MË TEPËR PËR TEMËN



Disa arsye pse priren të jetojnë më gjatë...

Ja çfarë bëjnë francezët ndryshe

Çfarë është ekzaktësisht kjo sëmundje?

A mundet POTS të shkaktojë migrenë?

Sindroma e dehiscencës së kanalit superior

Ju merren mendtë? “Fajtori” mund të jetë veshi…