Raportuesi për Kosovën në Parlamentin Evropian, Igor Soltes, ka thënë se “nuk duhet lejuar që të ketë aparteid me vizat për Kosovën”. Ai i ka thënë se nuk i din arsyet pse disa vende anëtare të Bashkimit Evropian refuzojnë të japin pëlqimin për liberalizimin e vizave për qytetarët e Kosovës.
Komentet e eurodeputetit slloven, pasojnë deklaratat e ditëve të fundit të disa zyrtarëve të Bashkimit Evropian se heqja e vizave për qytetarët e Kosovës mund të merr më shumë kohë sesa që pritej. Pritjet ishin që liberalizimi i vizave të merrte dritën e gjelbër në dhjetor të këtij viti, por kohët e fundit janë shtuar zërat skeptik brenda BE-së rreth kësaj mundësie.
Megjithatë ai shpreson se kjo çështje do të jetë në agjendën e Këshillit të Ministrave në dhjetor të këtij viti.
Në fillim të muajit dhjetor, në Prishtinë pritet që të qëndrojë edhe Komisioneri i BE-së për Zgjerim dhe Fqinjësi të Mirë, Johannes Hahn, kur edhe mund të qartësohet sado pak nëse ky proces do të përmbyllet gjatë këtij viti. /Konica.al/
