Çdo vit në 14 Nëntor Organizata Botërore e Shëndetësisë dhe Federata Botërore e Diabetit (IDF) organizon Ditën Botërore të Diabetit.
Në këtë kuadër sot në Tiranë, në sheshin ‘Skënderbej’ në orën 9:30 – 10 u organizuan takime ndërgjegjësuese në ‘sallonin e Diabetit’ me pacientë, të cilëve iu kryen matje të glicemisë falas dhe me qytetarë të ndryshëm që u informuan mbi këtë sëmundje kronike.
Mëso dhe vepro ndaj diabetit ishte tematika kryesore. E pranishme në këtë organizim ishte Ministrja e Shëndetësisë dhe Mbrojtjes Sociale, Ogerta Manastirliu, Prof. Florian Toti, Kryetari i shoqatës së Diabetit në Shqipëri etj.
Diabeti është një sëmundje kronike me kosto të lartë sociale, shëndetësore dhe ekonomike, por sot ndër të tjera ministrja ka evidentuar se:
– Me buxhetin e vitit 2019, pas fëmijëve 0-18 vjeç rimbursojmë falas fishat e diabetit edhe për studentët;
– Lehtësojmë mundimet e pacientëve me diabet të cilët nuk kanë më nevojë të vijnë në Tiranë, por konsulta ka nisur të bëhet pranë spitaleve rajonale;
– Garantojmë kontrollin mjekësor bazë falas për çdo qytetar të grupmoshës 35-70 vjeç për diagnostikimin e hershëm të diabetit;
– Mundësojmë terapinë e plotë falas nga skema e barnave të rimbursueshme ka shtuar Ministrja Manastirliu.
Nga pjesëmarrësit u krijua rrethi blu si shenjë sensibilizimi në këtë fushatë që u bë ditën e sotme.
Sipas Institutit të Shëndetit Publik prevalenca e Diabetit në Shqipëri në popullatën adulte është 1.9%, që do të thotë se kemi afërsisht 60 mijë diabetikë.
Në fakt numri duhet të jetë 2-3 herë më i lartë, pasi në disa depistime të kryera në Tiranë (2004, 2006, 2008, 2009,2010) prevalenca e Diabetit të padiagnostikuar ka qenë 3-4%, që do të thotë se në realitet shifra e përafërt e diabetikëve duhet të jetë 120-150 mijë.
Mosha më prekur nga diabeti është grupmosha 40-65 vjeç që përbën gati 40% të rasteve, por diabeti tip 2 po haset gjithnjë e më shpesh edhe në moshat 30-40 vjeç.
Diabeti më i shpeshtë është diabet tip 2 me 90% dhe 10% diabet tip 1. Diabeti tip 1 është kryesisht te fëmijët dhe moshat e reja. Ky tip diabeti zhvillohet në përgjithësi papritur.
Shenjat e diabetit janë: urinim i shpeshtë ditën dhe natën, etje e shtuar, shtim oreksi, tharje goje. Diabeti jep ndërlikime si në enët e vogla të gjakut, por jep edhe ndërlikime aterosklerotike në enët e mëdha të gjakut.
Diabeti jep komplikacione në sy, këmbë, zemër, veshka dhe në tru, nëse shifrat e sheqerit në gjak nuk mbahen afër vlerave normale diabetit.
Diabeti mund të parandalohet, ndaj bëj jetë të shëndetshme, mbro të ardhmen tënde!
VAZHDO TË LEXOSH MË TEPËR PËR TEMËN
“Kam diabet! Si të mbaj sheqerin nën kontroll”
