Prej vitesh është vënë në duke problemi i gërryerjes së shtratit të lumit të Vjosës.
Së fundmi për ti dhënë zgjidhje dhe për të ndihmuar në rehabilitimin e situatës, ka nisur një investim për ndërtimin e pesë argjinaturave në zonën e Mifolit që pritet të mbrojë nga gërryerjet e lumit Vjosë krahun e majtë të shtratit.
Investimi i bashkisë së Vlorës është ndarë në dy faza, 39 milionë lekë në fazën e parë dhe 51 milionë lekë në fazën e dytë.
Mungesa e argjinaturës në këtë pjesë të Vjosës ka sjellë përmbytje të vazhdueshme në zonën e Novoselës, për shkak të daljes së lumit nga shtrati.
Kryetari i bashkisë së Vlorës, Dritan Leli tha se investimi i kryer ka si qëllim të përmirësojë situatën, por nuk mund të ndalojë në mënyrë përfundimtare përmbytjet.
Ndërkaq administratori i njësisë administrative të Novoselës, Kanan Shakaj tha se ura e re ndërtuar në pjesën e autostradës Vlorë-Levan, është e ngushtë dhe krijon një digë artificiale për lumin.
Sipas tij, nëse nuk ndërtohet mbi rrugë edhe një urë e re në autostradë, atëherë përmbytjet do të vijojnë.
Zona e Novoselës dhe fshatrat përreth vitet e fundit kanë përjetuar disa herë përmbytje për shkak të vërshimit të ujërave të lumit Vjosë, në periudhat e shirave të mëdha.
