Hyrja në fuqi e ndalimit të importit të automjeteve më të vjetra se 10 vite datë prodhimi ka nxitur tregtarët e makinave të përdorura në vend që të importojnë masivisht muajin e kaluar.
Sipas të dhënave të tregtisë së jashtme, të publikuara nga Instituti i Statistikave, zëri i importit të mjeteve të transportit gjatë Nëntorit, muaji i fundit kur mund të importonin makina më të vjetra se 2009-a, ka prekur vlerën më të lartë në histori.
Muajin e kaluar u importuan rreth 5 miliardë lekë (rreth 40 milionë euro) mjete transporti, afro 40% më shumë krahasuar me të njëjtën periudhë të vitit të kaluar.
Ndër vendet që kanë një treg të madh importi në automjetesh në Shqipëri, rritja më e madhe regjistrohet për Gjermaninë, në rritje me 31% dhe për Italinë, prej nga importet janë rritur me 66%. Në vlerë, importet e makinave nga Gjermania ishin 2.1 miliardë lekë, ndërsa nga Italia 1.1 miliardë lekë.
Edhe Shtetet e tjera si, Shtetet e Bashkuara të Amerikës, Belgjika apo Austria regjistrojnë një rritje të konsiderueshme. Pra, të dhënat tregojnë qartë se tregtarët kanë shfrytëzuar ditët e fundit përpara hyrjes në fuqi të vendimit të qeverisë për të krijuar stok të makinave të vjetra.
Nga data 2 Dhjetor e këtij viti është i pamundur importi i makinave më të vjetra se 10 vjet.
VAZHDO TË LEXOSH MË TEPËR PËR TEMËN
Ndalohet importi i këtyre makinave pas 2 dhjetorit
