Pas 5 muajsh opozita thyen bojkotin e Kuvendit dhe rikthehet në Kuvend. Katër deputetë të PD dhe katër të LSI morën pjesë sot në seancë plenare.
Nga deputetët e PD në seancën e sotme morën pjesë Luçiano Boçi, Valentina Duka, (dy pedagogë) Izmira Ulqinaku dhe Ervin Salianji. Ndërsa nga LSI, Floida Kërpaçi, Luan Rama, Petrit Vasili dhe Kejdi Mehmetaj. Deputetët ishin në limitet e djegies së mandatit prej mungesës së gjatë në Kuvend. Sipas afateve ligjore dhe rregullores së Kuvendit, mandatet skadojnë në datën 15 janar.
Shkas për thyerjen e bojkotit u bë protesta e studentëve dhe amendamentet e depozituara një ditë më parë nga kryetarja LSI-së, Monika Kryemadhi. Ajo propozoi që qeveria të japë 1% të Prodhimit të Brendshëm Bruto, GDP, për arsimin, si edhe të krijohet një Fond Emergjence për Arsimin me vlerë 5 miliardë lekë.
Amendamentet u depozituan në Kuvend nga deputetet Floida Kërpaçi dhe Kejdi Mehmetaj, ndërsa Kryemadhi tha se “beteja” do zhvendosej në Kuvend për të mbështetur studentët dhe duke paralajmëruar njëherazi kështu edhe thyrjen e bojkotit të Kuvendit.
Pas nisjes së seancës, kreu i Kuvendit, Gramoz Ruçi njoftoi deputetët për propozimet e LSI dhe pas fjalimeve të Kejdi Mehmetajt, Luçiano Boçit dhe Luan Ramës nga LSI dhe përgjigjes së kryeministrit Edi Rama, Kuvendi refuzoi amendamentet me votat e maxhorancës.
Ndërsa deputetët e opozitës braktisën seancën në shenjë proteste.
Rama tha sot në seancën plenare se protesta ishte një mësim për qeverinë. Kryeministri ironizoi kryetaren e LSI, Monika Kryemadhi dhe tha se kjo e fundit, me ndryshimet që do bëhen në arsim, do ngelet pa titullin e doktoraturës, por vetëm me cizme në dorë.
