Buxheti i bashkisë së Skraparit për vitin 2019 ka mbetur pa u miratuar për shkak të votës kundër nga këshilltarët e majtë.
Bashkia drejtohet nga LSI dhe pas debateve të shumta, këshilltarët e majtë me 9 vota kundër rrëzuan buxhetin me pretendimin se në këtë bashki ka më shumë punonjës krahasuar me numrin e banorëve.
Fatos Hasanaj, kreu i grupit të PS-së u shpreh se nuk do të ketë miratim buxheti pa ndryshimet e kërkuara.
“Të gjithë të ardhurat që do kursehen nga fondi i pagave do të kalojnë për investime në zonën e Tomoricës, një zonë e varfër” u shpreh ai.
Nga ana tjetër kryebashkiaku Nesim Spahiu tha se vendimi është krejtësisht politik i urdhëruar nga deputeti i PS-së në këtë zonë, Adnor Shameti.
Këshilli bashkiak përbëhet nga 9 anëtarë të majtë, 4 të LSI, 1 i PD dhe 1 i PR.
