Përfitimet e stërvitjes së rezistencës shkojnë përtej rëndësisë së formimit të muskujve. Një dokument i ri shkencor tregon se kjo stërvitje mund të jetë gjithashtu një trajtim i shkëlqyeshëm për depresionin.
Depresioni dhe ankthi janë probleme shumë të përhapura që ndikojnë në aftësinë tonë për të punuar dhe produktivitetin në punë. Sot në mbarë botën, mbi 300 milionë njerëz vuajnë nga depresioni, i cili shkakton paaftësi dhe më shumë se 260 milionë jetojnë me çrregullime të ankthit.
Sipas një vlerësimi të kohëve të fundit nga OBSH, ankthi dhe depresioni i kushtojnë ekonomisë globale 1 trilion dollarë në vit përsa i përket humbjes së produktivitetit.
Në Evropë, kostot janë vlerësuar në masën 1% të PBB-së. Megjithatë nga ana e qeverisjes tonë nuk ka politika apo paralajmërime që të detyrojnë kompanitë, bizneset , apo institucionet për ndërmarjen e veprimeve dhe masave për mbrojtjen e punonjësve ndaj stresit dhe përkujdesjen për shëndetin mendor të punonjësve.
Depresioni zakonisht trajtohet me barna ose psikoterapi, por këto mund të jenë të shtrenjta, të ngadalshme për të vepruar, ose joefektive (për disa persona) – kështu që studiuesit janë në kërkim të trajtimeve të tjera plotësuese.
Një prej tyre është të ushtruarit fizik, i cili shërben si një si një një armë e fortë kundër depresionit, sa që çdo psikolog ose profesionist i shëndetit mendor që do të konsultonit së pari do t’ju pyeste për aktivitetin tuaj fizik.
Hulumtimet sugjerojnë se stërvitja e rezistencës mund të sjellë përfitime si për mendjen, ashtu edhe për shëndetin fizik. Hulumtuesit në Universitetin e Limerick, në Irlandë, zhvilluan një studim të rëndësishëm mbi efektet e trajnimit të rezistencës në simptomat e depresionit. Ata arritën në përfundimin se ajo mund “të reduktojë ndjeshëm simptomat e depresionit tek të rriturit”.
Kërkimet e reja sugjerojnë se stërvitja e rezistencës, përvec përfitimeve fizike tashmë të njohura gjerësisht si djegia e yndyrnave dhe ndërtimi i masës muskulare, gjithashtu mund të mbështesë një mendje të shëndetshme dhe të ekuilibruar.
Përfitimet për shëndetin mendor falë stërvitjes së rezistencës:
• Përmirësim i kujtesës;
• Përmirësimi i kontrollit të veprimeve;
• Mundësi për ulje të depresionit;
• Shumë më pak lodhje kronike;
• Cilësi më e mirë e gjumit;
• Përmirësim i njohurive;
• Ulje ankthit;
• Rritje e vetëbesimit.
Në një artikull të botuar në Psikiatrin JAMA, hulumtuesit nga Universiteti i Limerick- Irlandë, zhvilluan një meta-analizë të 33 proceseve klinike që përfshinin 1,877 pjesëmarrës, mbi efektet e stërvitjes së rezistencës në simptomat e depresionit, të tilla si ndjenjat e padobishmërisë, humbjes së interesit në aktivitete dhe humorit të ulët.
Autorët e studimit konkluduan se “stërvitja me ushtrime të rezistencës redukton në mënyrë të konsiderueshme simptomat depresive tek të rriturit”.
Kjo ishte pa marrë parasysh nëse pjesmarrësit janë stërvitur për zhvillimin e forcës dhe formimit të muskujve, apo për një shëndet të përgjithshëm të mirë . Autori kryesor i dokumentit Brett Gordon ka shpjeguar se kjo stërvitje nuk është një kurë shëruese për depresionin, por ka pohuar se provat janë bindëse.
Është interesante të theksohet se përmirësimet nëpërmjet stërvitjes së rezistencës mund të jenë veçanërisht të efektshme për njerëzit me simptoma më të mëdha depresive.
Megjithëse dokumenti nuk ka hyrë në detaje rreth asaj se si ushtrimet e rezistencës ndikojnë tek truri njeriut, studimet e mëparshme kanë treguar se stërvitja mund të nxisë rrjedhje më të madhe të gjakut në organe dhe lirimin e kimikateve për përmirësimin e humorit si endorfina.
Gordon thekson se stërvitja e rezistencës tregon rezultate më pozitive krahasuar me trajtimet e tjera për depresionin, të tilla si ilaçet kundër depresionit dhe terapitë e sjelljes.
Nga momenti që hulumtuesit kanë vërejtur përmirësime të lidhura me një gamë të gjerë të programeve të stërvitjes së forcës, Gordon thekson se nuk mund të përcaktojë një regjim të vetëm trajnimi për shëndetin mendor. (Megjithatë, kishte disa dëshmi që mbështesin efektet e rutinave më të shkurtra të mbikqyrura prej më pak se 45 minuta.)
Ai këshillon që të ndiqen udhëzimet e programit të Kolegjit Amerikan të Mjekësisë Sportive për trajnimin e rezistencës, i cili përfshin trajnimin së paku dy herë në javë duke bërë çdo herë 8 deri në 12 përsëritje të 8 deri në 10 ushtrimeve të forces.
Por, ndërsa ky studim aktual ka shqyrtuar në mënyrë specifike stërvitjen e rezistencës, ekzistojnë gjithashtu prova që sugjerojnë se edhe format e tjera të aktivitetit fizik, siç është ushtrimi aerobik, kardio dhe yoga, të cilat mund të përmirësojnë simptomat depresive. Mesazhi themelor i një stërvitje profesionale për konsumatorët në këtë pikë është e qartë.
Rekomandime për Ushtrimet e Trajnimit të Rezistencës:
• Kryeni një minimum prej 8 deri në 10 ushtrimesh per stërvitjen e grup- muskujve të mëdhenj;
• Stërvitja nuk duhet të jetë shumë e gjatë;
• Programet më të gjata se një orë janë të shoqëruara me shkallë më të larte braktisjeje;
• Zgjidhni më shumë komplekse ushtrimesh, ose ushtrime që përfshijnë më shumë muskuj njëkohësisht;
• Zgjidhni ushtrime dhe lëvizje që përfshijnë këmbët, bustin, krahët, shtytje – tërheqje;
• Ushtrohuni minimalisht 2 ditë në javë;
• Nëse ushtroheni 3 ditë në javë, zgjidhni ditë jo të njëpasnjëshme.
