Në një tjetër dalje publike, ministrja e Energjisë dhe Infrastrukturës, Belinda Balluku njoftoi skanimin e të gjitha kontratave operative të HEC-eve në vend. Ajo po ashtu deklaroi se do të ngrinë të gjitha kontratave jo operative deri në përfundim të procesit të skanimit.
“Vetëm 96 kontrata për HEC-e të dhëna në vend janë operative. Jam këtu për të njoftuar nisjen e një proces skanimi për dokumentacionin e çdo subjekti të licensuar”,- tha ministrja e re.
Ministrja sqaroi se procesi do të bazohet në dy kritere, nëse kompanitë e licensuara i kanë përmbushur kushtet teknike dhe afatet kohore si dhe kriteri i përputhshmërisë me kërkesat mjedisore.
Balluku dha se gjatë kësaj kohe deri sa të kalojnë në skaner të gjitha kontratat do të pezullohen ato që janë jooperative.
Balluku e cilësoi të papranueshëm rastin e ndërtimit të HEC-it mbi kanionin e Holtës në Gramsh dhe tha se në bashkëpunim ministrin e Mjedisit, Blendi Klosi do të trajtohet në formën e një diskutimi me banorët.
Me të marrë detyrën ministrja e re e MiE shkarkoi nga detyra Drejtorin i Autoritetit Shtetëror të Rrugëve (ARRSH), Afrim Qëndro, duke e zëvendësuar me ish-ministren e Mbrojtjes së Sipërmarrjes, Sonila Qato.
Nga detyra u dorëhoq edhe kreu i OST Klodian Gradeci. Vendimet vijnë pas skandalit me kompaninë “DH Albania”e cila fitoi dy tendera me vlerë 30 milionë euro për Unazën e Re dhe për një linjë transmetimi mes Burrelit dhe Peshkopisë.
Ajo po ashtu shkarkoi edhe drejtorin e Portit të Durrësit Afrim Baka. Në vend të tij është emëruar drejtor i Autoritetit Portual Durrës Genti Tare.
Një tjetër vendim i marrë prej saj ishte edhe anulimi i koncesionit të aksit Thumanë-Kashar, patë e të cilit siç tha ministrja, do të përdoren për “Paktin për Universitetin”.
