Një pol i tretë politik është paralajmëruar të krijohet së fundmi si pasojë e rritjes së presionit të partive të vogla.
Kryetari i PAA-s, Agron Duka, tha se në kushtet kur dy partitë kryesore nuk ndryshojnë kodin zgjedhor, e vetmja zgjidhje për tu faktorizuar është bashkimi i partive të vogla.
Ndërsa Koço Kokëdhima, akuzoi Bashën si të paaftë për të drejtuar opozitën.
Partitë e vogla po shkojnë drejt një poli të tretë politik në zgjedhjet vendore, me qëllim maksimalizmin e votave dhe peshës elektorale.
Pjesë e këtij poli pritet të jetë edhe Partia Agrare Ambjentaliste, ndërsa kryetari Agron Duka, tha se vetëm në këtë formë mund ti bëhet ballë kodit elektoral që ai e quan diskriminues.
“Nëse duam të shmangim kasaphanet e deritanishme elektorale në kurriz të votave tona, bashkimi mbetet rruga e vetme.”
Ndërsa, kreu i Partisë Zgjidhja, Koço Kokëdhima, akuzoi ashpër dy partitë e mëdha, duke theksuar se atyre u intereson të mos bëjnë ndryshime, pasi sipas tij vjedhin dhe cënojnë në vazhdimësi proçeset.
Kokëdhima foli për protestat e studentëve.
“Nuk ka përmbushje të kërkesave të tyre nëse nuk çlirohet Shqipëria, nëqoftëse nuk rivendoset Republika, nëqoftëse nuk rivendosen zgjedhjet në Shqipëri, nëqoftëse nuk i kthehet sovraniteti popullit tonë.”
Duke akuzuar ashpër kreun e opozitës, Basha, Kokëdhima e cilëson atë të paaftë si lider, ndërsa tha se po tallet me popullin opozitar.
