Hungaria ka ritheksuar mbështetjen ndaj proceseve integruese të Shqipërisë.
Në margjinat e Konferencës së Varshavës për situatën në Lindjen e Mesme, Ministri në Detyrë për Evropën dhe Punët e Jashtme Gent Cakaj zhvilloi një takim dypalësh me Ministrin e Jashtëm të Hungarisë Péter Szijjártó ku shkëmbyen pikëpamjet rreth ecurisë së procesit të integrimit evropian të Shqipërisë.
Ministri në Detyrë Cakaj u ndal tek arritjet që ka shënuar Shqipëria sidomos sa i takon hapave të ndërmarra në përmbushjen e pesë prioriteteve dhe kushteve për hapjen e negociatave.
Ministri Szijjártó rikonfirmoi mbështetjen e Hungarisë në proceset me të cilat do të jetë e angazhuar Shqipëria në muajt në vijim, sidomos sa i takon procesit të integrimit evropian.
Në planin bilateral, të dy bashkëbiseduesit u ndalën në nevojën e forcimit ligjor mes dy vendeve dhe atij të bashkëpunimit ekonomik.
Ministri i Jashtëm i Hungarisë Szijjártó e ftoi Ministrin në Detyrë Cakaj për një vizitë zyrtare në Budapest, ftesë të cilën Ministri Cakaj e pranoi me kënaqësi.
