Presidenti i Venezuelës, Nicolás Maduro, e ka quajtur qeverinë e Donald Trump një “bandë ekstremistësh” dhe fajësoi SHBA për krizën e vendit të tij.
Në një intervistë me BBC, Maduro tha se nuk do të lejonte ndihma humanitare në Venezuelë, pasi ishte një mënyrë për SHBA-të që të justifikonin një ndërhyrje. “Ata po nxisin luftën për të marrë përsipër Venezuelën”, tha ai.
Shtetet e Bashkuara dhe qeveritë më perëndimore kanë njohur udhëheqësin e opozitës Juan Guaido si president i përkohshëm.
Maduros po i shtohet presioni i brendshëm dhe ndërkombëtar për të thirrur zgjedhje të parakohshme presidenciale në mes të një krize ekonomike të përkeqësuar dhe akuzave për korrupsion dhe shkelje të të drejtave të njeriut.
Marrëdhëniet mes SHBA dhe Venezuelës ishin shumë të tensionuara përpara se administrata e Presidentit Trump të bëhej një nga vendet e para që mbështeste Guaidon si udhëheqës të përkohshëm.
Venezuela hoqi marrëdhëniet diplomatike në përgjigje, ndërsa Trump tha se përdorimi i forcës ushtarake mbeti “një opsion”.
Në një intervistë të rrallë, Maduro tha se shpresonte që “ky grup ekstremist në Shtëpinë e Bardhë të mposhtet nga një opinion i fuqishëm publik në botë”.
Duke folur në kryeqytetin Caracas, ai tha për BBC: “Është një luftë politike, e perandorisë së Shteteve të Bashkuara, të interesave të së djathtës ekstreme që qeveris sot për të marrë përsipër Venezuelën “.
SHBA ka imponuar një sërë masash ekonomike për Venezuelën, duke përfshirë kundër kompanisë shtetërore të naftës, PDVSA. Sekretari i Shtetit, Mike Pompeo, e ka quajtur qeverinë një “diktaturë katastrofike”.
Kur u pyet, nëse ai besonte se Trump ishte një “supremacist i bardhë”, Maduro tha: “Ai është dhe haptazi … Ata na urrejnë, na nënvlerësojnë”.
Presidenti ka refuzuar ndihmat humanitare të huaja në vend, një lëvizje që po organizohet nga opozita. Ai tha se Venezuela kishte “kapacitetin për të plotësuar të gjitha nevojat e popullit të saj” dhe nuk kishte pse të “kërkonte nga askush”. Por për vite qytetarët janë përballur me mungesa të artikujve bazë, si ilaçet dhe ushqimet.
Tre milionë njerëz, ose 10% e popullsisë, kanë lënë vendin pasi ekonomia filloi të përkeqësohet më 2014, sipas OKB.
Maduro, u rizgjodh për një mandat të dytë vitin e kaluar, por u akuzua për manipulim votash. Shefi i Asamblesë Kombëtare të kontrolluar nga opozita, Guaido, e shpalli veten president më 23 janar, duke thënë se kushtetuta e lejonte që ai të merrte pushtetin përkohësisht. Dhe bota, tani duket sikur është ndarë në dy kampe.
VAZHDO TË LEXOSH MË TEPËR PËR TEMËN
Si Venezuela po komplikon bisedimet e paqes në Kolumbi
“Zien” Venezuela/ Pse u shkëputën lidhjet me SHBA-në?
Pse Putinit i intereson kaq shumë Venezuela?
