Komisioni i BE për Punët e Jashtme dhe Liritë Civile, Drejtësisë dhe Punët e Brendshme kritikoi Shqipërinë dhe vendet e tjera kandidate për Ballkanin në BE për “stanjacion” përsa u përket çështjeve të sundimit të ligjit.
Seanca e sotme dëgjimore shqyrtoi përparimin e bërë dhe sfidat e vazhdueshme, me të cilat përballen vendet kandidate të BE-së në përmbushjen e kritereve themelore të BE. Mes të ftuarve ishte edhe Drejtori i Përgjithshëm për Fqinjësinë dhe Bisedimet e Zgjerimit në Komisionin Evropian, Christian Danielsson dhe Gianni Buquicchio, President i Komisionit të Venecias.
Para se të pranohet në Bashkimin Evropian, secili vend kandidat duhet të përmbushë kriteret e Traktatit të Kopenhagenit, të cilat përbëhen nga rregulla themelore që përcaktojnë, nëse një vend ka të drejtë të bashkohet me bllokun apo jo.
Gjatë seancës dëgjimore, Danielsson, i cili vizitoi Tiranën pak ditë më parë, komentoi se sundimi i ligjit është një vlerë themelore dhe thelbësore dhe se një vend duhet të respektojë dhe të promovojë vlerat e përbashkëta duke përfshirë sundimin e ligjit.
“Shumë vende që dëshirojnë të bashkohen me BE janë larg arritjes së kritereve dhe në disa prej tyre kemi kthim mbrapa”, tha ai, duke shtuar se shtetet kandidate, si Shqipëria, duhet të tregojnë vendosmëri për të ecur përpara me proceset e anëtarësimit në BE.
Presidenti i Komisionit të Venecias Gianni Buquicchio, tha se Gjykatat Kushtetuese duhet të jenë të pavarura, në mënyrë që ata të mbrojnë sundimin e ligjit, duke vënë në dukje se politikanët janë të prirur t’i sulmojnë këto gjykata, kur nuk u pëlqen gjykimi.
Ai theksoi se aktualisht, Shqipëria nuk ka një Gjykatë Kushtetuese funksionale dhe sipas tij, kjo ka rezultuar në situata ku ligje antikushtetuese janë miratuar pa patur mundësi për ankimim.
Buquicchio shtoi se prania e sundimit të ligjit duhet të jetë një “element kyç” për të vendosur, nëse një vend pranohet në BE.
