Ministri i Punëve të Jashtme të Serbisë, Ivica Daçiç, akuzoi shtetet e Bashkimit Evropian se nuk janë të interesuara për ta zgjidhur çështjen ndërmjet Kosovës dhe Serbisë.
Daçiç u shpreh se Shtetet e Bashkuara mund të kontribuojnë në vazhdimin e procesit të bisedimeve, por vetëm nëse ndihmojnë në heqjen e vendimit për taksën të vendosur nga Kosova.
Këto deklarata ai i ka bërë në prag të vizitës së diplomatit amerikan, David Hale, i cili do të zhvillojë vizita në Beograd dhe Prishtinë në datat 8 dhe 9 mars. Ministri serb vlerësoi edhe një herë angazhimin e Shteteve të Bashkuara të Amerikës për zgjidhjen e çështjes së Kosovës.
David Hale u shpreh më herët se Kosova duhet të heqë vendimin për taksën në mënyrë që të vazhdojë dialogu i Brukselit, pasi, sipas tij, tashmë është koha të arrihet një marrëveshje finale Kosovë-Serbi.
