Gjatë vizitës së tij të fundit në qytetin e Pogradecit, presidenti i Republikës së Shqipërisë, Ilir Meta, ka bërë një deklaratë mjaft të fortë duke theksuar se në shërbim të zgjidhjes së ngërçit politik, është i gatshëm të japë edhe dorëheqjen.
Kjo deklaratë ka bërë mjaft bujë në mediat vendase por jo vetëm, pasi shumë prej atyre ndërkombëtare i kanë dhënë hapësirë pasqyrimit të fjalës së tij.
Gazeta prestigjioze “New York Times”, televizioni “Fox News”, “Washington Post”,”DailyMail”, si dhe shumica e agjencive të lajmeve të cilat kanë raportuar situatën politike në vend, kanë pasqyruar gjerësisht qëndrimin e kreut të shtetit, Ilir Meta.
“Në këtë drejtim, edhe pse nuk kam asnjë përgjegjësi për këtë situatë që është krijuar edhe pse kam bërë çdo përpjekje prej gati dy vitesh në këtë detyrë, për të parandaluar një situatë dhe një krizë të tillë, përsëri jam i gatshëm unë i pari të sakrifikoj në emër të një zgjidhjeje politike që rivendos normalitetin kushtetues, institucional, politik, demokratik në vend dhe që garanton ecjen e shpejtë drejt çeljes së negociatave në BE, jam i gatshëm për të dyja ekstremet.
Që nga dorëzimi i mandatit tim si President pasi të sigurohem që vendi ka një zgjidhje politike parimore, kushtetuese, solide që e çon përpara, e deri tek sakrifikimi i jetës sime si Salvador Alende për të ndaluar instalimin e një junte që mund ta kthente Shqipërinë 30 vite pas.” -deklaroi Presidenti Meta, duke bërë jehonë edhe në mediat ndërkombëtare.
