Banorët e Kurbneshit në Mirditë janë ngritur në protestë duke kundërshtuar ndërtimit e dy HEC-ve mbi lumin e Urakës.
Ata kërkojnë shfuqizimin e koncesioneve pasi ndërtimi i HEC-ve dëmton rënde këtë perlë të natyrës.
Banorët shprehen të vendosur në rezistencën e tyre për të penguar ndërtimin e HEC-ve në këtë zone. Në mbeshtetje të banoreve është edhe ipeshkevi i Mirditës monsinjor Gjergj Meta.
“Jo HEC-eve mbi Urakë! Për shkak të meshëve në Bukmirë e Katedralen e Rrëshenit, nuk mund të jem në mbështetje të banorëve të Selitës në protestën e tyre kundër ndërtimit të HEC-eve mbi lumin Urakë. Por shpirtërisht dhe me gjithë zemrën time jam aty me ta.
Zoti na ka dhanë natyrën, lumenjtë e detet, nuk mund dhe nuk duhet t’i përçudnojmë. I bëj thirrje shtetit që të mos lejojë të përsëriten gabimet që janë bërë mbi Fan apo në Valbonë a kudo tjetër. Zëri i komunitetit selitas që jeton aty me shekuj duhet të dëgjohet. Unë jam me ta e do të jem gjithmonë në mënyrë që Uraka e bukur të mbetet sikurse e ka bërë Zoti”, thuhet në reagimin e Gjergj Metës.
