Kryeministri Edi Rama e ka pasur kryefjalë ‘bashkimin’ në fjalimin e tij në çeljen e samitit të diasporës. Ai e ka nisur me zhvillimet në Maqedoninë e Veriut, duke i parë ndryshimet atje edhe si rezultat i këtij samiti, ndonëse nuk e shprehur literalisht.
Rama deklaroi se pa shqiptarët nuk do kishte Maqedoni të Veriut, nuk do kishte marrëveshje të Prespës e nuk do kishte Maqedoni e Veriut në NATO.
“Është e nevojshme për të ndarë me ju vëllazërisht disa mendime që besoj i vlejnë vëllazërisë sonë shqiptare pavarësisht nëse jetojmë në Shqipëri, Kosovë, Maqedoninë e Veriut, në Malin e Zi, Jugun e Serbisë apo kudo tjetër. Së pari unë dua të them se nga samiti i shkuar në këtë samit kanë ndodhur disa gjëra dhe e them me bindje se nga samiti i shkuar në këtë samit, Shqipëria është më e mirë dhe shqiptarët janë më mirë.
Nëse ka nevojë t’ju freskoj kujtesën ishte jo 100 as 10 vjet më parë por ishte mes këtyre dy samiteve momenti kur shqiptarët në atë që sot është Maqedonia e Veriut u vendosën në shënjestër si të ishin qytetarë të kategorisë së dytë dhe e ashtuquajtura platforma e Tiranës u kthye në një autodafe për të ndarë hesapin zgjedhor brenda Maqedonisë duke i fryrë zjarrit të një konflikti që mund ta kishte kthyer atë vend shumë vite prapa. Falë ndërveprimit vëllazëror me përgjegjësi kombëtare por edhe me vetëdije të lartë politike mes nesh këtu në Tiranë dhe liderëve në Maqedoni jo vetëm që shqiptarët sot janë shumë më mirë se ç’ishin dje por ajo që për presidentin e Maqedonisë quhej e papranueshme, gjuha e Nënë Terezës u bë gjuhë zyrtare e Maqedonisë së Veriut. Ndaj dua ta përshëndes përzemërsisht dhe jo për protokoll mikun tonë Ali Ahmetin ta falënderoj për praninë dhe realisht ta përgëzoj sepse pa shqiptarët nuk do kishte Maqedoni të Veriut, nuk do kishte marrëveshje të Prespës dhe nuk do kishte Maqedoni të Veriut në NATO”, deklaroi Rama.
Rama tha se historia ka treguar se shqiptarët janë armiqtë më të mëdhenj të shqiptarëve dhe kur ata janë të bashkuar gjithmonë fitojnë.
“Kudo që shqiptarët bashkohen, ata janë më të mirë dhe fitojnë. Historia e ka treguar, nuk dua të sjell këtu as Gjergj Fishtën, as Faik Konicën, as Fan Nolin por edhe e sotmja na tregon se armiku më i madh i shqiptarëve janë shqiptarët. Ne kudo ku bashkohemi nuk na mund dot askush. ndaj shqiptarëve në Tuz iu them bashkohuni. Ne kudo që bashkohemi nuk na mund askush. Shqiptarëve në Tuz u them bashkohuni dhe mos lejoni të humbi për shkak të armiqsive të kota me njëri-tjetrin. Nuk mund të rri pa e thënë atë që ndjej dhe që ndjeva gjatë kohës që foli presidenti i Kosovës. Dua të them se sot Kosova dhe shqiptaria përmes Kosovës është përballë një sfidë historike. Nuk ka pasur dhe nuk mund të ketë gjë më të rrezikshme dhe penguese për shqiptarët kur përballë u dalin shqiptarët. Kur për hesape të mjedisit politik, marrin flamurin dhe e kthejnë në një armë për të luftuar me njeri tjetrin se kush është më i mirë apo më i keqi”- tha Rama.
