Diplomacia amerikane vijon përmes zyrtarëve të ndryshëm që të ushtrojë presion mbi Prishtinën për vijimin e negociatave dypalëshe me Beogradin.
Ndihmëssekretari i ardhshëm i Shtetit për Europën dhe Eurazinë, Filip Riker që e cilëson taksën 100 për qind ndaj Serbisë, një pengesë serioze për dialogun. Riker, thotë se dialogu mes palëve është dëmtuar rëndë nga tarifa doganore 100 % ndaj produkteve me origjinë serbe dhe boshnjake që Kosova ka miratuar nëntorin e kaluar.
Sipas ish-ambasadorit amerikan në Maqedoni, kjo masë e palës kosovare po rrezikon gjithçka, madje edhe marrëdhëniet bilaterale me SHBA-të.
“Nëse Prishtina zyrtare nuk kthehet në negociata pa kushte, atëherë do të rrezikojë të ardhmen e saj europiane dhe jo vetëm. Kosovës nuk po i kërkojmë të japë Hënën, por të heqë dorë nga taksa për një kohë të caktuar për interesat vetjakë, të SHBA-ve dhe të gjithë rajonit.
Është fatkeqësi dhe e habitshme që akoma kemi mosmarrëveshje serioze me Qeverinë e Kosovës për këtë çështje. Kosova nuk do të humbasë asgjë nga negociatat, por i rrezikon të gjitha nëse nuk ulet në tryezën e dialogut, përfshirë raportet me SHBA-të, që kanë investuar shumë në suksesin e saj si shtet i pavarur, multietnik dhe sovran”, deklaroi ai.
Rikier përmendi marrëveshjen e Prespës mes Greqisë dhe Maqedonisë së Veriut, duke thënë se liderët e rajonit duhet ta marrin si shembull për arritjen e kompromiseve historike.
Duke u fokusuar më gjerësisht te rajoni i Ballkanit, Riker tha se Shtetet e Bashkuara mbështesin aspiratat evropiane të të gjitha vendeve të gadishullit jo prej zemërmirësisë, por sepse është e vetmja mënyrë për të pasur paqe dhe stabilitet në mbarë Evropën.
