Italia do të jetë në votime më 26 maj për të zgjedhur anëtarët e Parlamentit Europian. Këtu janë pesë gjëra kryesore për t’u parë.
Salvini kudo
Ministri i Brendshëm Matteo Salvini kryeson listën e partisë së tij anti-emigrantr në të gjitha zonat italiane, pavarësisht se ai nuk ka ndërmend të kthehet në Parlamentin Evropian. Ofertat e tij për të formuar një aleancë me partitë e krahut të djathtë populiste dhe nacionaliste anembanë kontinentit kanë fituar mbështetje.
Gratë nga ‘Pesë Yjet’
Luigi Di Maio, kreu i lëvizjes Pesë Yjet (M5S), që qeveris në një koalicion me Lidhjen, ka emëruar pesë gra për të udhëhequr listat e tij: një sipërmarrëse, një profesoreshë, dy nëpunëse civilë dhe një gazetare.
Di Maio fitoi mbështetje nga anëtarët e lëvizjes në internet, por kishte zhurmë për vendimin e tij pasi ai ka zgjedhur figura të panjohura që kanë pasur shumë pak përvojë brenda M5S deri tani.
Berluskoni kthehet?
Miliarderi Silvio Berluskoni po shpreson për rikthimin e tij politik. 82-vjeçari është shfaqur ‘në ring’ përsëri për partinë e tij të qendrës së djathtë Forza Italia (FI), të cilën ai e themeloi 25 vjet më parë.
Pasi është prekur nga disa skandale, Berluskoni po përpiqet të rifitojë pozitën si një burrë shteti me përvojë, i cili mund ta shpëtojë Italinë nga populizmi, duke ruajtur marrëdhëniet e mira me Lidhjen.
Një ish-prokuror edhe një ‘shpëtimtar’
Në vitin 2014, 40 për qind e italianëve votuan për Partinë Demokratike (PD) të qendrës së majtë nën Matteo Renzi. Tani partia do të jetë e kënaqur të fitojë vetëm gjysmën e atij rezultati.
Udhëheqësi i ri, Nicola Zingaretti, i ka kërkuar disa prej figurave më simbolike të shoqërisë civile të ndihmojnë. Midis tyre janë Franco Roberti, një ish-prokuror kombëtar kundër mafias, dhe Pietro Bartolo, një mjek i famshëm nga ishulli Lampedusa, që ka punuar për shpëtimin e emigrantëve në Mesdhe.
Mussolinë në garë
Mbesa e diktatorit italian Benito Mussolini, eurodeputetja Alessandra Mussolini, 56 vjeç, po kandidon për partinë FI të Berluskonit, ndërsa djali i kushëririt të saj Caio Giulio Cesare Mussolini, 50 vjeç, po kandidon për të djathtët ‘Vëllezërit’ e Italisë. Ata janë në listat në zonat zgjedhore të ndryshme dhe të dy duket se do të ecin mirë.
VAZHDO TË LEXOSH MË TEPËR PËR TEMËN
“Jelekverdhët” do të kandidojnë në zgjedhjet europiane?
82 vjeç dhe ende ‘i etur’ për pushtet
Britania duhet të marrë pjesë në zgjedhjet europiane
