Roma e sotme vazhdon të befasojë. Gjendet koka e madhe prej mermeri e Dionisit, i njohur gjithashtu si Baku, perëndia e lashtë romake e verës, vallëzimit dhe pjellorisë.
Zbulimi u konstatua nga arkeologët, gjatë gërmimeve në zemër të qytetit. Koka e gjetur në rrënoja i përket një statuje të madhe të kësaj perëndie, që daton nga epoka perandorake.
Arkeologët po gërmonin pranë një muri mesjetar, kur gjetën kokën e mermerit, për të cilën ata besojnë se përfaqëson Dionisin, që romakët e njihnin si Baçhus.
“Fytyra është e rafinuar dhe e hirshme, e re dhe femërore. Të gjitha këto na bëjnë të mendojmë se mund të jetë një përshkrim i Dionisit”. Koka e mermerit do të pastrohet dhe do të vendoset në muze për t’u parë nga vizitorët.
Koka daton midis shekullit të parë para Krishtit dhe shekullit të 2 pas Krishtit, sikur saktëson Claudio Parisi Presiçe, drejtor i muzeve arkeologjike të Romës.
“Sytë e zbrazët, që me siguri ishin të mbushura me qelq ose me gurë të çmuar, datojnë në shekujt e parë të Perandorisë Romake”, – ka thënë ai.
“Sipërfaqja nuk është plotësisht e dukshme, sepse ende nuk i kemi dhënë një pastrim tërësor. Mendojmë se ende mund të ketë gjurmë të ngjyrës origjinale, të ruajtur në brezin rreth flokëve “.
Dionisi ishte biri i Zeusit dhe Semelës, bijës së vdekshme të mbretit të Tebës. Ai njihej si zot i verës, kultivimit të verës dhe kultivimit të rrushit, si dhe të fertilitetit, teatrit dhe ekstazës fetare. U adhurua nga grekët e lashtë, si një nga 12 perrënditë e Olimpit, para se të përfshihej në panteonet romake të perëndive si Bachus (Baku).
VAZHDO TË LEXOSH MË TEPËR PËR TEMËN
Librat që ndryshuan botën
Këtu u vra Jul Çezari
Në Apoloni, në tokën e perandorëve
