Presidenti i Kosovës, Hashim Thaçi, ka mbetur tejet i zhgënjyer nga takimi i Ministrave të Jashtëm të BE-së dje në Luksemburg dhe konkluzionet e deklaratës së përbashkët të tyre.
Në një postim në Facebook, Thaçi shkruan se “me shqetësim i kam lexuar konkluzionet zhgënjyese të Këshillit për Çështje të Përgjithshme të Bashkimit Evropian.
Sipas Thaçit, Kosova nuk është fajtore për problemet e brendshme të BE-së dhe nuk paraqet asnjë rrezik për Unionin.
Kreu i Shtetit të Kosovës thotë se fatkeqësisht, BE-ja është duke e trajtuar Kosovën ndryshe krahasuar me vendet e tjera, dhe kjo padrejtësi nuk kalon pa u vërejtur.
“Prandaj, ne nuk do të mund të cilësohemi si fajtorë për zvogëlimin e rolit të BE-së në rajon dhe në Kosovë për shkak të dështimeve të vazhdueshme të saj.Përderisa shtete fqinje, si Shqipëria dhe Maqedonia e Veriut, kanë pritur lajme substanciale në rrugën e tyre për anëtarësim në BE, ne kemi pritur diçka krejt minimale.Ne kemi pritur vetëm një reflektim pozitiv sa i përket fundit të izolimit të padrejtë të popullit të Kosovës.
Unë ftoj liderët institucionalë dhe ata të partive politike parlamentare që të reflektojnë për situatën e rëndë në të cilën ndodhet vendi ynë në raport me realizimin e perspektivës tonë për anëtarësim në BE dhe NATO. Izolimi dhe stagnimi duhet të marrin fund. Qytetarët e Republikës së Kosovës e meritojnë zhvillimin dhe integrimin e Kosovës në strukturat euroatlantike.”, u shpreh Thaçi.
VAZHDO TË LEXOSH MË TEPËR PËR TEMËN
S’ka shpresë për dialog, taksa “ndanë” Kosovë-Serbi në Paris!
Kosova dhe Serbia në një tavolinë? Hahn: Vështirë!
