Komuniteti Mysliman i Shqipërisë ka liruar sot nga detyra Myftiun e Tiranës, Ylli Gurrën.
Mësohet se Myftiu i ri i kryeqytetit do të jetë Lauren Luli, i cili do të zëvendësojë Gurrën, që nga ana tjetër, do të marrë postin e këshilltarit të Kryetarit të KMSH.
Në zgjedhjet e marsit kur kryetar i ri i Komunitetit Mysliman Shqiptar u zgjodh Bujar Spahiu, Gurra deklaroi se nuk pranonte rezultatin, madje e quajti procesin zgjedhor një farsë.
Njoftimi i KMSH:
Kryetari i Komunitetit Mysliman të Shqipërisë H. Bujar Spahiu zhvilloi një takim në selinë e Komunitetit Mysliman me imamët e xhamive të Tiranës, ku prezantoi myftiun e ri të Tiranës, z. Lauren Luli.
Gjatë takimit kreu i KMSH-së vuri theksin në dhënien e një impulsi të ri institucionit të myftinisë. Gjithashtu z. Spahiu vlerësoi punën dhe kontributet e deritanishme në këtë myftini.
Myftiu i ri i Tiranës, z. Lauren Luli është teolog. Ai ka kryer studimet e larta në Fakultetin e Shkencave Islame në Bursa të Turqisë dhe më pas masterin shkencor në Shkencat e Hadithit në KU Bedër, Tiranë. Ai ka ushtruar detyrën e tij si imam dhe myfti si dhe prej dy vitesh mbante postin e nënkryetarit të KMSH-së.
Imamët e Myftinisë së Tiranës mirëpritën emërimin e z. Luli në këtë detyrë si edhe shprehën gatishmërinë për të bashkëpunuar dhe çuar përpara shërbimin fetar në kryeqytetin e vendit.
Ish Myftiu i Tiranës z. Gurra tashmë mban postin e Këshilltarit të Kryetarit të Komunitetit Mysliman të Shqipërisë.
