Sekretari i Shtetit i SHBA-së Mike Pompeo tha të hënën se shpresonte që Koreja e Veriut dhe Shtetet e Bashkuara të mund të “ishin pak më krijuese” kur të dyja palët të rifillojnë bisedimet që synojnë të japin fund programit të armëve bërthamore të Pyongyang-ut.
Duke folur në një intervistë në radio në “Sean Hannity Show”, Pompeo nuk tha se kur negociatat do të rifillonin. Në fund të qershorit ai kishte thënë se ka gjasa të ndodhë, “diku në korrik … ndoshta në dy ose tre javët e ardhshme”.
Presidenti Donald Trump u takua me udhëheqësin e Koresë së Veriut Kim Jong Un muajin e kaluar. Gjatë takimit, Trump u bë presidenti i parë i SHBA që hyri në Korenë e Veriut dhe tha se palët ranë dakord të rifillojnë bisedimet.
Trump dhe Kim janë takuar tri herë dhe mbajtën dy takime mbi çështjen bërthamore. Bisedimet në Hanoi në shkurt përfunduan pa marrëveshje, pasi Shtetet e Bashkuara këmbëngulën që Koreja e Veriut të hiqte dorë plotësisht nga armët bërthamore dhe Koreja e Veriut kërkoi lehtësim të sanksioneve.
Vërejtjet e fundit të Pompeo vijnë pasi presidenti kinez Xi Jinping i kërkoi Trumpit të tregojë fleksibilitet në trajtimin me Phenianin dhe të lehtësojë sanksionet “në kohën e duhur”.
Kina, fqinji i Koresë së Veriut dhe aleati kryesor, nënshkruan sanksione pasi Koreanët e Veriut kryen teste të përsëritura bërthamore dhe raketore, por ka sugjeruar që ato të mund të reduktohen.
Zyrtarët e Koresë së Jugut kanë shprehur pasiguri se bisedimet midis Shteteve të Bashkuara dhe Koresë së Veriut mund të bëhen këtë muaj.
