Derbi i kryeqytetit startoi me një ngjarje të turpshme, që nuk ka aspak lidhje me futbollin, një përplasje të dhunshme mes disa tifozëve të të dy palëve, që prishi atë organizim fantastik për një ndeshje që synohet të jetë reklamë për futbollin në Shqipëri.
Sipas informacioneve, shkak për sherrin janë bërë hedhjet e shashkave në drejtim të njëra-tjetrës nga ana e dy grupeve të tifozëve, ndërsa disa prej tyre vendosën të zbresin në fushë, mbrapa portës, për t’u sqaruar nga afër.
U desh ndërhyrja e forcave të policisë, për të qetësuar sadopak situatën.
Situata u mor nën kontroll nga forcat e rendit dhe vëmendja kaloi e gjitha në fushë, aty ku Tirana nuk ia doli të thyejë hegjemoninë e kuqe të viteve të fundit, duke u mposhtur me rezultatin 1-2.
Bardheblutë e nisën vrullshëm takimin, duke treguar qartë se kanë dëshirë të rikthehen te fitorja në derbi, që mungon prej 6 vitesh dhe ia dolën të krijojnë disa situata të rrezikshme në zonën e partizanit, por pa arritur të dërgojnë topin në rrjetën e portës së Alban Hoxhës. Shumë më të qetë në fushë dukeshin kampionët në fuqi, që mbyllnin mirë hapësirat dhe tentonin herë pas here me kundërsulme, ndërsa në rastin e parë të rrezikshëm, arritën të gjejnë golin e avantazhit me anë të Willian Cordeiro.
Ishte një aksion në dukje pa pretendime nga ana e të besuarve të Franco Lerdës, por Vangjeli doli nga pozicioni, ndërsa një përplasje mes Torrasës dhe Kërçikut, bëri që të dy të rrëzoheshin dhe Cordeiros t’i shkonte topi si dhuratë para portës së Likës, aty ku braziliani nuk mund të gabonte.
Tirana tentoi menjëherë reagimin, por vetëm 6 minuta më vonë, ishte sërish Partizani, që në topin e dytë që dërgoi në zonë, arriti të shënojë edhe golin e dytë, këtë herë me anë të sulmuesit Solomon, që shfrytëzoi saktë një krosim të ardhur nga krahu.
Festë në kampin e kuq dhe zhgënjim në atë bardheblu, ndërsa as 5 minutat shtesë të akorduara nga arbitri kryesor i takimit, nuk sollën asnjë ndryshim në rezultat dhe skuadrat iu drejtuan dhomave të zhveshjes për të marrë porositë e radhës nga trajnerët respektivë.
Pritej një Tiranë shumë më kërkuese dhe aktive në pjesën e dytë, por disavantazhi prej dy golash peshonte shumë mbi shpinën e futbollistëve bardheblu, që ishin të nxituar dhe të paqartë në organizimin e manovrës sulmuese.
Do të duhej të kalonin më tepër se 20 minuta nga pjesa e dytë, për të parë kërcënimin e parë real të Tiranës, por Cobbinah rrëshqiti pikërisht në momentin që duhej të jepte goditjen drejt kuadratit të portës, që e kishte vetëm pak metra larg. Pak minuta më vonë bardheblutë kërcënuan rrezikshëm kuadratin e hoxhës, por këtë herë ky i fundit reagoi mjaft mirë duke grushtuar topin, ndërsa në një goditje dënimi të mëvonshme, Hoxhallari gaboi totalisht, duke çuar topin në tribunë.
Nuk mbeti prapa as Partizani, që në një zbritje të rrezikshme, i shkoi shumë pranë golit të tretë me Solomon, që i gjendur i vetëm përballë Ilion Likës, tentoi befasinë me gjuajtje nga distanca, por reagimi i kapitenit bardheblu ishte edhe më i mirë se goditja.
Në momentin që derbi dukej se “po flinte” dhe ritmi i lojës po binte, aktivizimi i Grent Halilit, golshënuesit më të mirë të Tiranës deri në këtë javë, shtoi entuziazmin dhe freskinë te bardheblutë, teksa pikërisht nga një zbritje e tij, u fitua këndorja që solli golin që rihapi ndeshjen.
Ishte vetë Halili që ekzekutoi goditjen nga këndi, duke çuar topin në shtyllën e parë, aty ku Kristi Vangjeli me mjaft zgjuarsi e devijoi për ta çuar në shtyllën e dytë, ku po priste shkodrani Edon Hasani, që i shpëtoi mbulimit të Romeros dhe devijoi topin për në rrjetën e Alban Hoxhës.
Minutat e fundit të sfidës janë tejet interesante, me Tiranën që ka dëshirë dhe entuziazëm për të tentuar të paktën një barazim, por mungon freskia në këmbët e futbollistëve dhe Grent Halili i vetëm e ka të vështirë të bëjë diferencën.
Vërshëllima e trefishtë e arbitrit kryesor Kridens Meta la në fuqi triumfin me rezultatin 1-2 të Partizanit, që triumfoi për herë të 66 në historinë e derbit të kryeqytetit, duke ruajtur kështu hegjemoninë e viteve të fundit.
