Një “shqiptar” ka befasuar Inter-in e Antonio Conte-s dhe ka bërë të heshtë San Siro-n.
Zikaltrit e kanë nisur në mënyrën më të keqe sezonin e ri të Champions League pasi kanë barazuar 1-1 në shtëpi me Slavia Prague, ndeshje e vlefshme për Grupin F. Kanë qenë miqtë që kanë shënuar të parët me ish-sulmuesin e Bylisit dhe Skënderbeut, Peter Olayinka, në minutën e 64-t.
23-vjeçari është bërë nigeriani i parë që shënon në debutimin e tij në Champions League pas Yakubu, i cili realizoi një tregolësh me Maccabi-n kundër Olympiakos në shtatorin e 2002-shit.
Kur mendohej se çekët do të largoheshin me tri pikët nga Milano, Barella ka gjetur golin e barazimit në minutën e 92-të.
Një rezultat zhgënjyes për Inter-in, që ka në grup edhe Barcelona-n dhe Borussia Dortmund-in.
Mbrëmjen e sotme është luajtur edhe Lyon-Zenit, ndeshje e vlefshme për Grupin G. Takimi i luajtur në Parc Olympique Lyonnais është mbyllur në barazim 1-1. Miqtë kanë kaluar në avantazh me Azmoun në minutën e 41-të, ndërsa vendasit kanë barazuar me një penallti të Depay-t në të 50-ën.
Ky ka qenë barazimi i gjashtë i francezëve në gjashtë ndeshjet e fundit të Champions League të luajtura në shtëpi; një rekord në këtë kompeticion.
