Presidenti i Republikës, Ilir Meta, ka reaguar pas vendimit të mazhorancës për të rrëzuar në seancën e sotme plenare tetë dekretet e tij, mes të cilëve edhe dy koncesionet e rrugëve Orikum-Dukat dhe Milot-Balldren, të cilat Kreu i Shtetit i kishte rikthyer për rishqyrtim në Kuvend.
Kreu i Shtetit ironizon kryeministrin Edi Rama në një mesazh të shkurtër në “Facebook”, teksa poston dhe një fotografi me të, ku shkruan se do që t’i japë “Urdhrin e Skënderbeut”, por ai kërkon vetëm “Urdhrin e Tao-Spiropalit”.
“O Zot ç’më ka gjetur me këtë njeri! Unë dua t’i jap “Urdhrin e Skënderbeut”, ky kërkon vetëm “Urdhrin e Tao-Spiropalit”!”, shkruan Meta.
Me votat e mazhorancës, Kuvendi rrëzoi sot dekretet e Ilir Metës për rishqyrtimin e tetë projektligjeve, ndërsa këtij vendimi i bëri “jehonë” edhe vetë kryeministri Edi Rama.
Ndonëse ndodhej në Pragë, ku po merr pjesë në një samit të rëndësishëm, Rama gjeti kohë të shpërndante në “Facebook” një për një fjalën e ministrave të tij dhe të kreut të grupit parlamentar të PS, Taulant Balla, të cilët njoftuan rrëzimin e dekreteve të Metës, si dhe kandidaturën e tij të tretë për kreun e Kontrollit të Lartë të Shtetit, Petraq Milon.
Ndërkohë, një ditë më parë, Presidenti Meta premtoi se do të dekoronte kryeministrit Rama me “Urdhrin e Skënderbeut”, nëse ky i fundit merr datën për çeljen e negociatave të Shqipërisë me BE-në.
“Unë i jap dekoratë Edit më datë 18 tetor vetëm ai të marrë datën e çeljes së negociatave të Shqipërisë. Siç iu dha ai dekorata ambasadorëve që çelën negociatat vjet e parvjet, unë do t’ia jap dekoratën, ai le të mos e pranojë. Bile do t’i jap urdhrin e Skënderbeut. Absolutisht”, tha Meta, mbrëmjen e kaluar.
