U grumbullua me Shqipërinë, por Italia e pa se çfarë humbet dhe nxitoi menjëherë për ta marrë. Marco Molla është portieri shqiptar, i cili ka vendosur të përfaqësojë fanellën e kaltër të vendit fqinj.
Natyrisht, një vendim personal dhe askush nuk mund ta paragjykojë djaloshin 17-vjeçar, i lindur dhe i rritur në Sesto Fiorentina. Aktualisht ai luan me të rinjtë e kësaj grupmoshe te Bologna.
Molla është kthyer në një titullar të padiskutueshëm për këtë grupmoshë, ndërsa është grumbulluar edhe për Botërorin U-17 që po zhvillohet në Brazil.
Në përballjen e mesnatës kundër Meksikës, portieri shqiptar është shndërruar në një protagonist për Italinë. Teksa ndeshja ishte 0-0, Molla ka ruajtur ekuilibrin për të tijtë, duke ndalur kundërshtarin nga pika e bardhë.
Në fund të kaltrit, triumfuan me rezultatin 2-1 duke siguruar kualifikimin nga grupi. Kështu, Molla ka dhënë një kontribut të jashtëzakonshëm, ndërsa shqiptari do të vazhdojë ëndrrën në Kampionatin Botëror.
VAZHDO TË LEXOSH MË TEPËR PËR TEMËN
Kur Buffon ndeshet me djemtë e shokëve të tij…
