Shteti i Katarit qëndroi në krah të Shqipërisë dhe popullit shqiptar që prej ditës së parë të këtij tërmeti, duke ofruar ndihma urgjente – në koordinim të plotë me autoritetet lokale – për të dëmtuarit në zonat e prekura në bashkitë Tiranë, Durrës, Thumanë, Vorë dhe Kavajë.

Ambasadori i Shtetit të Katarit, z. Ali bin Hamad Al Marri, ka kryer disa vizita inspektuese në zonat e prekura, nën direktivat e Lartësisë së tij Emirit Sheikh Tamim bin Hamad Al Thani, ku mbikëqyri nga afër shpërndarjen e ndihmave nga Fondi i Katarit për Zhvillim në bashkëpunim Qatar Charity.

Ai shprehu ngushëllimet e tij për viktimat e tërmetit, dhe konfirmoi solidaritetin dhe qëndrimin e Shtetit të Katarit përkrah Shqipërisë në këto momente të vështira.
Ambasadori u shpreh gjithashtu se ai shpreson që Shqipëria të tejkalojë efektet e tërmetit sa më shpejt, të kapërcejë fazën e tanishme e të rimëkëmbet sa më parë, duke theksuar mbështetjen e vazhdueshme të Shtetit të Katarit për Republikën e Shqipërisë dhe popullin mik shqiptar.